Bugun Tojikistonda prezident saylovi bo‘lib o‘tmoqda

Bugun, 11 oktyabr kuni erta tongdan respublikadagi 3375 ta, shuningdek, 29 ta xorijiy davlatda 39 ta saylov uchastkasida prezidentlik saylovi jarayonlari boshlandi.

Saylovlarda 4,9 milliondan ko‘proq kishi ishtirok etish huquqiga ega.

Prezident lavozimiga 5 nomzod kurash olib bormoqda: amaldagi prezident Imomali Rahmon, kommunistlardan Miroj Abdulloyev, Sotsialistik partiyadan Abduhalim G‘afforzoda, agrariylardan Rustam Latifzoda va Iqtisodiy islohotlar partiyasidan Rustam Rahmatzoda.  

Saylovlarda g‘alaba qozonish uchun saylovchilarning kamida 50 foizining ovozini to‘plash kerak. Bunda saylovlardagi ishtirok 50 foizdan kam bo‘lmasligi lozim.

Saylovlar jarayonini O‘zbekiston, Rossiya, MDH, ShHT va YeXHTdan 122 nafardan ko‘proq vakil kuzatib bormoqda.

Saylovlarning dastlabki natijalari 12 oktyabrda, yakuniy natijalari esa 10 kun ichida e’lon qilinadi.