Imom-xatiblar qadimiy qadamjolarni ziyorat qildi
Viloyatdagi jome masjidlar imom-xatiblari Payariq tumanidagi Imom Buxoriy majmuasi hamda Samarqand shahridagi tarixiy qadamjolarni ziyorat qildi.
Viloyat hokimligi hamda O‘zbekiston musulmonlari idorasi viloyat vakilligi tomonidan o‘tkazilgan tadbir ishtirokchilari Imom Buxoriy majmuasini ziyorat qilib, uning yonida bunyod etilgan ilmiy tadqiqot markazi va Hadis ilmi maktabi bilan tanishdi.
– Ziyorat joylarga kelgan kishi qalban poklanib, ruhan tetiklashadi, – deydi Samarqand shahridagi “Xo‘ja Nisbatdor” jome masjidi imom-xatibi Boboxon Boboxonov. – Imom Buxoriy majmuasi yonida bunyod etilgan ilmiy tadqiqot markazi va Hadis ilmi maktabi, u yerda yaratilgan sharoitlar bizni juda quvontirdi. Ochig‘i, Hadis ilmi maktabidagi shart-sharoitlar bilan tanishgach, ko‘pchiligimizda bu maktabda o‘qish ishtiyoqi tug‘ildi.
Imom-xatiblar shundan so‘ng “Mahdumi A’zam” va “Xo‘ja Doniyor” majmualarini ziyorat qilishdi.
Abdujabbor PO‘LATOV.
