Ko‘ngilga borar yo‘llar...
Bu dunyoda turfa-turfa
yo‘llar ichida sarson,
Goh yiqilib, goho turib
boradir mudom inson.
Qabul aylab hayotning baxt,
dard to‘la xatlarini,
Kechar ekan toki umr
go‘zal bekatlarini.
Manzil tomon eltguvchi bu
nurli yillar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Hamjihatlik ilmin bunda
o‘qib borsa uyg‘oq qalb,
Bog‘lanadir ko‘ngillarday
bunda yana Sharqu G‘arb.
Diydor sabab ruh o‘sadir,
shodlik, sevinch jonlanar,
Har yurakda umidlarning
bayrami nishonlanar.
Tinch davronga zeb berguvchi
o‘ngu so‘llar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Ko‘rdim oydin oqshomlarda,
sezdim oppoq saharlar,
Yurtim aro ochar chiroy
qishloqlaru shaharlar.
Bir nafaslik yo‘lga do‘ndi
olis masofalar xush,
Axir unda yelib borar
zamonaviy uchqur qush.
Shu qushlarga qanot bergan
ajib qo‘llar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Ezgulikni bayroq qilib,
yaxshi niyat aylab jo,
Millat kelar, quchog‘ingni
kengroq ochgin, ey dunyo!
Ko‘hna tarix nafasidan
olib yana zo‘r ilhom,
Istagidir bu yo‘llarni
yo‘llarga qo‘shmoq mudom.
Orzularni ushaltirgan
chin sururlar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Ajdodlardan an’anadir
unutilmas bu saboq:
Yo‘l qurmoq, dil bog‘lamoq,
birlashmoq, Vatan bo‘lmoq.
Ming e’zozga loyiq axir
shu yo‘riqni uqsa kim,
Zahmatkash xalq og‘irini
olib olg‘a chiqsa kim.
Bu ulkan baxt kimga yordir,
yor g‘ururlar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Bepoyon kengliklarga
tikildim bugun mag‘rur,
Bir his bag‘ishladi qalbim,
ko‘ksimga so‘nmas hovur.
Yo‘llar ketar bunda gulgun
tog‘-adir osha yana,
Samarqanddan Toshkent qadar,
Nukusdan to Farg‘ona.
Dedim, shu yo‘llarga umr
sochgan gullar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
Qalqib turgan olamda ne
qolgay inson izidan,
Qilgan yaxshi amalidan,
aytgan iliq so‘zidan?!
Sharaf erur ortida gar
Ona zamin, el qolsa,
Mehr bilan, shodlik bilan
bog‘lagan bir yo‘l qolsa.
Shu tilakni anglagan ul
yorug‘ dillar bor bo‘lsin,
Ko‘ngillardan ko‘ngillarga
borar yo‘llar bor bo‘lsin!
O‘tkir RAHMAT.
