"Maktabda shaxmat" loyihasi: 105 maktab shaxmatga ixtisoslashtiriladi
‼️ Bu haqda Prezidentimizning 2021 yil 14 yanvardagi "Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to‘g‘risida"gi qarori ijrosini ta’minlash, maktablarda o‘quvchilar o‘rtasida shaxmatni keng targ‘ib qilish va o‘rgatishga bag‘ishlangan davra suhbatida Samarqand viloyati xalq ta’limi boshqarmasi boshlig‘i, viloyat shaxmat federatsiyasi raisi Z.Shodiyeva aytib o‘tdi.
♟ Viloyat shaxmat federatsiyasi, viloyatdagi shaxmat, jismoniy tarbiya va sport uyushmalari rahbar-xodimlari ishtirok etgan muloqotda "Maktabda shaxmat" loyihasi va mazkur loyihani tizimli ravishda yo‘lga qo‘yish masalasi muhokama qilindi.
⏱ "Maktabda shaxmat" loyihasi doirasida umumta’lim muassasalarining boshlang‘ich sinf o‘quvchilarini shaxmatga o‘qitish, qamrovni yildan-yilga oshirish ko‘zda tutilgan. Shu maqsadda viloyatdagi 105 ta maktabni shaxmatga ixtisoslashtirish, maktablar o‘rtasida turnirlar o‘tkazilib, eng sara shaxmatchilarni tayyorlashga e’tibor qaratiladi.
Samarqand viloyati xalq ta’limi boshqarmasi axborot xizmati.
