Navoiy viloyatida ikkita yangi oltin koni ishga tushdi
Bu haqda "Navoiy kon-metallurgiya kombinati" AJ matbuot xizmati xabar berdi.
"Tomdi tumani hududida "Muruntov" koni tarkibida "Balpantog‘" va "Tomdibuloq" konlarining ochilish marosimi va bu yerda birinchi portlatish ishlari amalga oshirildi. Konlar 40 million tonnadan ortiq ma’dan zaxirasiga ega", deyilgan xabarda.
Unda aytilishiga ko‘ra, "Balpantog‘" va "Tomdibuloq" konlaridan 15 yil mobaynida yiliga 3 million tonnadan oltinga boy ma’dan qazib olinadi. Yangi konlarning oltin tarkibli ma’dan zaxiralari kombinatning 2-gidrometallurgiya zavodiga 33 kilometrlik temir yo‘llari orqali tashiladi.
Ushbu konlar ishga tushishi natijasida 653 ta yangi ish o‘rni yaratiladi.
