Naymanoboddan nega chempionlar chiqmayapti?
Naymanobod Nurobod tumanining qir-adirlari bag‘rida joylashgan qishloqlardan biri. Azaldan bu qishloq yigitlari alpqomat, polvon bo‘lgan. Bugungi kunda ham Naymanobodda sportsevar, ayniqsa, kurash bilan shug‘ullanadigan yoshlar ko‘pchilikni tashkil etadi. Ammo ular uchun zamon talablariga javob beradigan sport inshootlari yo‘q.
Ko‘klam paytda bolalar yaylovlarda, bog‘larda, soy bo‘ylarida, xullas, o‘zlariga qulay joyda kurashib ketaveradi. Yozning issiq va qishning sovuq kunlarida esa ularning sport mashg‘ulotlari bilan shug‘ullanishlarini inobatga olib, 2018 yilda maktab yaqinida hashar yo‘li bilan kichik bir sport zali qurib berdik. Zarur inventarlari bo‘lmagandan keyin sport zalning ham foydasi katta bo‘lmas ekan. Shunday bo‘lsa-da, farzandlarimiz bor imkoniyatdan foydalanib, sport to‘garaklari mashg‘ulotlariga qatnadi va viloyat miqyosida ko‘pgina musobaqalarda g‘oliblikni qo‘lga kiritdi.
Agar qishlog‘imizda yoshlarning sport bilan shug‘ullanishlari uchun mutasaddilar tomonidan zamonaviy sharoitlar yaratilsa, ularga ustoz-murabbiylar sifatli to‘garak mashg‘ulotlari o‘tib, to‘g‘ri yo‘l ko‘rsatsa, qishloq yoshlari orasidan respublika, hatto xalqaro sport musobaqalarida g‘oliblikni qo‘lga kiritadigan chempionlar yetishib chiqishiga ishonaman.
To‘lqin NIShONOV,
qishloq oqsoqoli.
