O‘zbekiston armiyasi tarixida birinchi marotaba qo‘mondonlar vakolatlari kengaytirildi
O‘zbekiston armiyasi tarixida birinchi marotaba harbiy unvon berish hamda lavozimga tayinlash bo‘yicha okrug qo‘mondonlari vakolatlari kengaytirildi. Bu haqda Markaziy harbiy okrug matbuot xizmati ma’lum qildi.
Mudofaa vazirining tegishli buyrug‘iga ko‘ra, endilikda qo‘mondonlar kichik serjant, III darajali serjant, II darajali serjant, I darajali serjant harbiy unvonlaridan tashqari, kichik ofitserlar tarkibiga - katta leytenant hamda kapitan unvonini berish huquqiga ega bo‘ldi.
Shu bilan birga, qo‘mondonlarga harbiy qism komandirlari o‘rinbosarlari, bo‘linma komandirlari, xizmat boshliqlarini lavozimga tayinlash hamda lavozimdan ozod etish kabi vakolatlar ham berildi.
Markaziy harbiy okrug qo‘shinlari qo‘mondoni, polkovnik A.Saidov buyrug‘i bilan 27 fevral kuni 3 nafar ofitserga – Samarqand va Jizzax garnizonida xizmat qilayotgan tibbiy xizmat katta leytenanti Xolmuhammad Umarov, katta leytenant Bobur Ro‘ziyev hamda tibbiy xizmat katta leytenanti Dilmurodjon Mirzayevga kapitan unvoni topshirildi.
Ma’lumot o‘rnida, 2020 yilga qadar ofitserlik unvonlari (leytenantdan polkovnik unvonigacha) Mudofaa vaziri tomonidan berilgan. General unvoni esa Prezident tomonidan topshiriladi.
