Polshaning "National-geographic.pl" elektron nashrida Samarqand haqida maqola berildi

Mamlakatning ushbu nufuzli nashrida "Osiyoning eng qadimiy doimiy aholi yashaydigan shaharlaridan biri yana ham ulg‘aygan" sarlavhali maqola e’lon qilindi, deb xabar qilmoqda "Dunyo" AA  muxbiri.

Maqolada 2025 yil 25 iyulda qabul qilingan qarorga asosan, Samarqandning rasmiy tarixi 3000 yilga teng deb e’lon qilinganligi haqida so‘z boradi. "Bu qaror Afrosiyob, Ko‘ktepa va Ko‘ksaroy maydonidagi arxeologik tadqiqotlarga tayanilgan holda qabul qilindi. Topilgan keramika, hayvon suyaklari va qadimgi devorlar shaharning birinchi ming yillik boshlaridayoq mavjud bo‘lganini isbotlamoqda." – deyiladi maqolada.

Samarqand Markaziy Osiyoning eng muhim tarixiy markazlaridan biri bo‘lib, u Aleksandr Makedonskiy va Chingizxon tomonidan zabt etilgan hamda Temuriylar davrida — XIV asrda o‘zining eng yuqori rivojlanish bosqichiga yetgan. Shahar ilm-fan va me’morlik markaziga aylangan va 1992 yili YuNESKOning Butunjahon merosi ro‘yxatiga kiritilgan.

Samarqandning yoshi yillar davomida qayta baholanib kelindi: avval 1500, so‘ngra 2500, keyin 2750 va hozirda 3000 yil deb belgilandi. Garchi bu raqam Samarqandni dunyodagi eng qadimgi shaharlarga aylantirmasa-da, masalan, Djebeyl (7000 yil), Damashq (5000 yil) va Luksor (4200 yil) kabi shaharlar undan ancha qadimiy hisoblanadi, ammo Samarqand Markaziy Osiyo tarixida beqiyos o‘rin tutadi.