Samarqand shahar ko‘rkamligi: Yangi departament qanday ishlayapti?
Viloyat hokimligi huzurida obodonlashtirish va ko‘kalamzorlashtirish departamenti tashkil etilganiga ikki oydan oshdi.
Vazirlar Mahkamasining “Samarqand shahrini obodonlashtirish ishlarini samarali tashkil etish va boshqarishni takomillashtirish chora-tadbirlari to‘g‘risida”gi qaroriga asosan Samarqand shahrining alohida ahamiyatga ega markaziy ko‘chalari hamda tarixiy osori-atiqalari joylashgan hududlarga olib boruvchi yo‘nalishlarda obodonlashtirish va ko‘kalamzorlashtirish ishlarini sifatli amalga oshirish maqsadida tashkil etilgan mazkur departament oldiga katta vazifalar qo‘yilgan.
- Samarqand shahrida o‘tkazilayotgan xalqaro darajadagi tadbirlarda markaziy ko‘chalar, tarixiy obidalar joylashgan hududlarga olib boruvchi yo‘nalishlarda obodonlashtirish ishlarini tashkil etyapmiz, - deydi viloyat hokimligi huzuridagi obodonlashtirish va ko‘kalamzorlashtirish departamenti direktori Baxtiyor Jo‘rayev. – Shu vaqtgacha ushbu vazifani bajarib kelgan Samarqand shahar obodonlashtirish boshqarmasidagi maxsus texnikalar eskirib qolganligi, obodonlashtirish hududining kengayib, qo‘shimcha maxsus texnika va ishchi-xodimlar jalb etilayotgani sababli ularga yuklangan vazifalar lozim darajada bajarilmay qolayotgan edi. Natijada sohada ilg‘or xorijiy tajribalar asosida ishlash tizimini joriy etish zarurati yuzaga keldi. Shahar obodonlashtirish boshqarmasidan 35 ta maxsus texnika va 754 nafar ishchi-xodimlar yangi departamentga o‘tkazildi.
Viloyat hokimi qarori bilan yangi departamentga shahardagi 21 ta ko‘cha va hududlar biriktirilgan bo‘lib, departament ishchilari tomonidan katta hajmdagi obodonlashtirish va ko‘kalamzorlashtirish ishlari amalga oshirib kelinmoqda. Jumladan, Samarqand xalqaro turizm markazi va Imom Buxoriy majmuasiga olib boruvchi ko‘chalarda 332 ming tup viola, geran, katarantus kabi o‘nga yaqin manzarali gul ekildi. Landshaft dizayn asosida o‘nga yaqin gulzorlar tashkil etilib, mavjud yashil hududlar kengaytirildi. Yo‘l bo‘ylari obodonlashtirilib, 182 ta manzarali chiroqlar o‘rnatildi. Shuningdek, Registon maydoni, Bibixonim, Amir Temur majmualari va boshqa tarixiy obidalar joylashgan mahallalar atrofida estetik muhit yaratish maqsadida maxsus bezak elementlari va yashil zonalar tashkil etildi.
Mustaqillik bayrami arafasida tashkilot ishchilari zimmasidagi yumushlar juda ko‘paygan. Bayram tadbirlari o‘tadigan maydonlarga turli ko‘rgazmali buta va gul ko‘chatlari o‘tqazish, ariq va lotoklar, yo‘l yoqalarini maishiy chiqindilardan tozalash kabi ishlar amalga oshirilmoqda.
- Qilayotgan ishlarimiz kundan kunga soni oshib borayotgan rasmiy mehmon va sayyohlarning ko‘z o‘ngida Samarqand shahrining turistik jozibadorligini oshirish, tarixiy obidalarning asl holida saqlanib qolishiga olib keladi, - deydi Baxtiyor Jo‘rayev. – Shuningdek, bu ishlarimiz tarixiy merosimizni asrab-avaylash hamda aholiga qulay va zamonaviy shahar muhitini yaratishga xizmat qilmoqda.
Dilmurod To‘xtayev.
