Prezident qarori: 2023-2025 yillarda 120 ming gektar ekin maydonlari ochiq elektron tanlov orqali aholiga ijaraga beriladi
O‘zbekiston Respublikasi Prezidentining qarori
Mamlakatda oziq-ovqat xavfsizligini va ichki bozorlarda narxlar barqarorligini ta’minlash hamda agrar sohada aholining tashabbuslarini qo‘llab-quvvatlash orqali ularning daromadlarini oshirish, shuningdek, “Bir hudud – bir mahsulot” tamoyili asosida qishloq xo‘jaligi mahsulotlari yetishtirishni kengaytirish hamda eksport salohiyatini oshirish maqsadida:
1. O‘zbekiston Respublikasi Prezidentining 2021 yil 23 noyabrdagi “Meva-sabzavotchilik va uzumchilikda oilaviy tadbirkorlikni rivojlantirish, qishloq xo‘jaligi ishlab chiqarishida dehqon xo‘jaliklarining ulushini oshirish chora-tadbirlari to‘g‘risida”gi PQ–20-son qaroriga muvofiq, fermer xo‘jaliklari va klasterlar foydalanishidagi past hosilli paxta va g‘alladan qisqartirilgan va aholiga uzoq bo‘lmagan hududlardan:
2022 yilda 80 ming gektar ekin maydonlarini;
2023-2025 yillarda 120 ming gektar ekin maydonlarini aholiga ochiq elektron tanlov orqali ijaraga berish belgilanganligi ma’lumot uchun qabul qilinsin.
2. Belgilansinki, Qoraqalpog‘iston Respublikasi va viloyatlarda fermer xo‘jaliklari hamda klasterlar foydalanishidagi paxta va g‘alladan qisqartirilgan hamda aholi punktlariga yaqin va suv ta’minoti yaxshi bo‘lgan yerlardan 2022 yil yakuniga qadar qo‘shimcha 20 ming gektar – umumiy 100 ming gektar ekin maydonlari, 2023 yilda 95 169 gektar ekin maydonlari 1 – 1.13-ilovalarga muvofiq aholiga ochiq elektron tanlov orqali ijaraga beriladi.
Bunda:
a) ekin maydonlari fuqarolarga 30 yil muddatga:
suv ta’minoti yaxshi bo‘lgan yerlardan – Andijon, Namangan va Farg‘ona viloyatlarida 0,15 gektardan 1 gektargacha, boshqa viloyatlarda 0,30 gektardan 1 gektargacha hamda Qoraqalpog‘iston Respublikasida 0,30 gektardan 2 gektargacha bo‘lgan o‘lchamlarda;
kam suvli yerlardan – viloyatlarda 0,50 gektardan 1 gektargacha hamda Qoraqalpog‘iston Respublikasida 0,50 gektardan 2 gektargacha bo‘lgan o‘lchamlarda ijaraga beriladi;
b) 2022-2023 yillarda dehqon xo‘jaligi yuritish maqsadida ekin maydonlarini aholiga berish uchun tashkil etiladigan ochiq elektron tanlovda 1 nafar talabgor ishtirok etgan taqdirda, istisno tariqasida, tanlov o‘tkazilgan hisoblanadi;
v) issiqxona tarmog‘i keng rivojlangan tumanlarda dehqon xo‘jaliklariga ajratib berilgan ekin maydonlarida isitish tizimlarini o‘rnatmagan holda yengil konstruksiyali issiqxonalar qurilishiga ruxsat beriladi.
3. Shunday tartib joriy etilsinki, unga muvofiq:
“Temir daftar”, “Ayollar daftari” va “Yoshlar daftari”ga kiritilgan aholiga dehqon xo‘jaligini yuritish uchun yer uchastkalari ochiq elektron tanlov orqali ijaraga berilganda, mazkur xatboshida nazarda tutilayotgan shaxslar yuqoridagi daftarlardan chiqarilmaydi va ular uchun qonunchilikda belgilangan barcha imtiyoz va preferensiyalar bir yil muddatga saqlab qolinadi;
imtiyoz va preferensiyalarning bir yillik amal qilish muddati dehqon xo‘jaligini yuritish uchun yer uchastkasiga bo‘lgan ijara huquqi davlat ro‘yxatidan o‘tkazilgan kundan boshlab hisoblanadi.
4. Qoraqalpog‘iston Respublikasi Vazirlar Kengashi, viloyatlar, tumanlar (shaharlar) hokimliklari Qishloq xo‘jaligi vazirligi (A.Voitov, X.Karimov) va Kadastr agentligi (F.Pulatov) bilan birgalikda:
a) bir oy muddatda 2022 yilda aholiga qo‘shimcha tarzda ochiq elektron tanlov orqali ijaraga beriladigan 20 ming gektar ekin maydonlarining, 2023 yil 1 yanvarga qadar 2023 yilda aholiga ochiq elektron tanlov orqali ijaraga beriladigan 95 169 gektar ekin maydonlarining aholi punktlariga yaqin, suv ta’minoti yaxshi bo‘lgan yerlardan tanlanishi va tuman (shahar) hokimliklarining zaxirasiga belgilangan tartibda qaytarilishi va davlat mulki sifatida davlat ro‘yxatidan o‘tkazilishini;
Bunda, yer uchastkalariga egalik qilish huquqi yoxud undan doimiy yoki muddatli foydalanish huquqining bekor qilinishi Yer kodeksining 36-moddasida belgilangan hollarda, jumladan, yer uchastkasidan oqilona foydalanilmaganda, ushbu qishloq xo‘jaligiga mo‘ljallangan yerlar uchun hosildorlik darajasi uch yil mobaynida normativdan (kadastr bahosiga ko‘ra) past bo‘lishida ifodalanganda, yer uchastkasidan tuproq unumdorligi pasayishiga, uning kimyoviy va radioaktiv moddalar bilan ifloslanishiga, ekologik vaziyatning yomonlashuviga olib keladigan usullar bilan foydalanilgan taqdirda, amalga oshiriladi;
b) zaxiraga olingan yer uchastkalarini davlat mulki sifatida davlat ro‘yxatidan o‘tkazish ishlari tuman (shahar) hokimliklari buyurtmasiga asosan amalga oshirilishini, bunda davlat ro‘yxatidan o‘tkazish ishlari Qoraqalpog‘iston Respublikasi byudjeti va viloyatlar mahalliy byudjet mablag‘lari hisobidan moliyalashtirilishini;
v) davlat mulki sifatida davlat ro‘yxatidan o‘tkazilgan ekin maydonlarining suv ta’minoti yaxshi bo‘lgan yerlarda – Andijon, Namangan va Farg‘ona viloyatlarida kamida 0,15 gektarga, boshqa hududlarda kamida 0,30 gektarga hamda kam suvli yerlarda kamida 0,5 gektarga teng bo‘lgan hajmlarda lotlarga ajratilib, bir oy ichida ochiq elektron tanlovga qo‘yilishini;
g) ekin maydonlarini tanlash va lotlarga ajratish ishlarida mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimlari yordamchilarining ishtirokini hamda ular tomonidan bildirilgan takliflar inobatga olinishini;
d) yer to‘g‘risidagi qonunchilik va ijara shartnomasi talablari bajarilmaganda, jumladan, ijaraga berilgan yer uchastkasidan oqilona foydalanilmaganda, talabgor tomonidan ochiq elektron tanlov orqali yerning ijara huquqini yutib olish uchun olingan qo‘shimcha majburiyatlar bajarilmaganda, yerga bo‘lgan huquq Yer kodeksi va “Dehqon xo‘jaligi to‘g‘risida”gi Qonunga asosan bekor qilinishi haqida dehqon xo‘jaliklari a’zolari orasida tushuntirish ishlari olib borilishini ta’minlasin.
Mazkur bandda belgilanayotgan topshiriqlar ijrosini o‘z vaqtida ta’minlamagan Qoraqalpog‘iston Respublikasi Vazirlar Kengashi Raisi, viloyatlar va tumanlar (shaharlar) hokimlari qonunchilikda belgilangan tartibda javobgarlikka tortilishi haqida ogohlantirilsin.
5. Bosh vazir o‘rinbosari Sh.M.G‘aniyev, Qishloq xo‘jaligi vazirligi (A.Voitov, X.Karimov), Qoraqalpog‘iston Respublikasi Vazirlar Kengashi Raisi, viloyatlar va tumanlar (shaharlar) hokimlari:
2022 yil yakuniga qadar qo‘shimcha 20 ming gektar, 2023 yilda 95 169 gektar ekin maydonlarini ochiq va shaffoflikni ta’minlagan holda dehqonchilik ko‘nikmalariga ega bo‘lgan, shu jumladan, “Temir daftar”, “Ayollar daftari” va “Yoshlar daftari”ga kiritilgan aholiga ajratsin;
mazkur maydonlarga Bog‘dorchilik va issiqxona xo‘jaligini rivojlantirish agentligi tavsiyasiga asosan, hududlar ehtiyojlari uchun zarur bo‘lgan va eksportbop qishloq xo‘jaligi ekinlari ekilishini ta’minlasin. Bunda, sabzavot, poliz, dukkakli, moyli va kartoshka ekinlarini intensiv usulda ekishga alohida e’tibor qaratilsin;
mahsulot yetishtiruvchilarga qishloq xo‘jaligi ekinlarini yetishtirish uchun zarur bo‘lgan moddiy-texnik resurslar, shu jumladan, urug‘lik, ko‘chat, mineral o‘g‘it va kimyoviy vositalar yetkazib berish, shuningdek, zaruriy agrotexnik xizmatlar ko‘rsatish ishlarini tashkil etsin;
agrosanoat klasterlari, tayyorlov, qayta ishlash va eksport qiluvchi korxonalarni jalb qilgan holda yetishtirilgan tayyor mahsulotni xarid qilish, uni qayta ishlash, saqlash, ichki va tashqi bozorlarga yo‘naltirish choralarini ko‘rsin;
O‘simliklar karantini va himoyasi agentligi (I.Ergashev) bilan birgalikda ekin maydonlarida zararkunandalar hamda kasalliklar tarqalishining oldini olish maqsadida tizimli kuzatuvlarni tashkil etib, dehqon xo‘jaliklariga ekinlarni himoya qilish xizmatlari o‘z vaqtida ko‘rsatilishini ta’minlasin;
qishloq xo‘jaligi mahsulotlarini yig‘ish, tashish, saqlash, qayta ishlash va sotishning barcha bosqichlarini qamrab olgan kichik agrologistika markazlari faoliyatini yo‘lga qo‘yish choralarini ko‘rsin.
Bosh vazir o‘rinbosari Sh.M.G‘aniyev, qishloq xo‘jaligi vaziri A.B.Voitov, Bog‘dorchilik va issiqxona xo‘jaligini rivojlantirish agentligi direktori X.M.Karimov mazkur chora-tadbirlarni o‘z vaqtida va samarali tashkil etish ustidan doimiy monitoring o‘rnatib, amalga oshirilgan ishlar haqida har oyda O‘zbekiston Respublikasi Prezidenti Administratsiyasiga axborot kiritib borsin.
6. Axborot va ommaviy kommunikatsiyalar agentligi (A.Xodjayev), O‘zbekiston Milliy teleradiokompaniyasi (A.Xadjayev), O‘zbekiston Milliy axborot agentligi (A.Ko‘chimov) Qishloq xo‘jaligi vazirligi (A.Voitov) bilan birgalikda mazkur qarorning mazmun-mohiyati hamda maqsad va vazifalarining ommaviy axborot vositalarida keng yoritilishini ta’minlasin.
7. O‘zbekiston Respublikasi Prezidentining va O‘zbekiston Respublikasi Hukumatining ayrim qarorlariga 2-ilovaga muvofiq o‘zgartirish va qo‘shimchalar kiritilsin.
8. Qishloq xo‘jaligi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
9. Ushbu qarorning ijrosini samarali tashkil qilishga mas’ul va shaxsiy javobgar etib qishloq xo‘jaligi vaziri A.B.Voitov, Mahallabay ishlash va tadbirkorlikni rivojlantirish agentligi direktori M.M.Ubaydullayev hamda Qoraqalpog‘iston Respublikasi Vazirlar Kengashi Raisi va viloyatlar hokimlari belgilansin.
Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Bosh vazir o‘rinbosari Sh.M.G‘aniyev zimmasiga yuklansin.
O‘zbekiston Respublikasi
Prezidenti Sh.MIRZIYoYeV
Toshkent shahri,
2022 yil 10 sentyabr
