Qurolli Kuchlar Harbiy tibbiyot akademiyasi tashkil etiladi
Toshkent tibbiyot akademiyasi huzuridagi harbiy-tibbiyot fakulteti negizida O‘zbekiston Respublikasi Mudofaa vazirligining yuridik shaxs maqomiga ega bo‘lgan O‘zbekiston Respublikasi Qurolli Kuchlari Harbiy tibbiyot akademiyasi tashkil etiladi.
Bu O‘zbekiston Respublikasi Prezidentining 22 oktyabr kuni qabul qilingan “Harbiy tibbiyot sohasida kadrlarni tayyorlashning sifat jihatidan yangi tizimini tashkil etish chora-tadbirlari to‘g‘risida”gi qarori bilan belgilandi.
Akademiyada tahsil olish uchun 2021/2022 o‘quv yilidan boshlab nomzodlar O‘zbekiston Respublikasi oliy tibbiy ta’lim muassasalari davolash fakultetlarining beshinchi bosqichini va tibbiy-profilaktika fakultetlarining to‘rtinchi bosqichini tamomlagan, o‘qish yakunlari bo‘yicha eng yuqori natijalarni ko‘rsatgan, o‘qishini Harbiy tibbiyot akademiyasida davom ettirish va kelgusida kontrakt bo‘yicha harbiy xizmatni o‘tash istagini bildirgan, shuningdek, sog‘lig‘ining holatiga ko‘ra, harbiy xizmatga yaroqli bo‘lgan talabalar orasidan O‘zbekiston Respublikasi Mudofaa vazirligi tomonidan tanlab olinadi.
Akademiyada kursantlarning majburiy ikki yillik o‘qishi ikki bosqichli harbiy tibbiyot o‘quv dasturi asosida: birinchi yil – bakalavriatda, ikkinchi yil – O‘zbekiston Respublikasi Qurolli Kuchlari uchun zarur bo‘lgan mutaxassisliklar bo‘yicha harbiy internaturada amalga oshiriladi.
Akademiyaning bakalavriat bosqichini tamomlagan kursantlarga dastlabki “tibbiy xizmat leytenanti” harbiy unvoni va “harbiy vrach” mutaxassisligini beradigan davlat namunasidagi diplom hamda harbiy internaturani tamomlagach, navbatdagi “tibbiy xizmat katta leytenanti” harbiy unvoni va tegishli mutaxassislik berilganligi to‘g‘risida belgilangan namunadagi guvohnoma beriladi.
