Samarqandlik maktab o‘quvchilari nufuzli «Young Scholars Award» mukofotini qo‘lga kiritishdi
Samarqandlik iqtidorli ikki maktab o‘quvchilari - Zafar Nurmamadov va Asadbek Oltinovlar bosh qarorgohi Peru poytaxti Lima shahrida joylashgan La Colegios Cruz Saco xalqaro ilmiy izlanish tashkilotining «Young Scholars Award» mukofotini qo‘lga kiritishdi.
15 yoshli Zafar Nurmamadov Samarqand shahar 13-umumta’lim maktabining 11-sinf o‘quvchisi bo‘lsa, Asadbek Oltinov hali 48 sonli maktabning 9-sinfida o‘qiydi.
La Colegios Cruz Saco xalqaro ilmiy izlanish tashkiloti – bu fan va texnologiyalar sohasida iqtidorli yoshlarni qo‘llab-quvvatlash va rivojlantirishga yo‘naltirilgan xalqaro ta’lim tashkiloti bo‘lib, u turli mamlakatlarda faoliyat yuritib, tabiiy va aniq fanlarni chuqur o‘rganishga hamda talabalar o‘rtasida tadqiqot ko‘nikmalarini rivojlantirishga qaratilgan dasturlarni taklif etadi. Ularning e’tirofiga sazovor bo‘lgan tadqiqot «Uch xil boshqaruv shakliga ega tashkilotlar (Til maktabi, IT tashkiloti va shifoxona) dagi boshqaruv tizimlarini differensial tahlil qilish» mavzusida yozilgan. O‘zining chuqur nazariy-ilmiy tahlili bilan ajralib turgan tadqiqot dolzarb ekanligi tufayli ham yuksak mukofot bilan e’tirof etildi.
