“Уйда ўтириб иш ўрни яратяпман, даромад топяпман”

Бу иштихонлик қуроқдўз ҳунарманд Раҳима Ҳакимованинг гапи. Бугунги кунда уйида ўтириб, ўзи яшаётган Ўзбекистон маҳалласида 10 нафар хотин-қизга даромадли иш ўрни яратган, ўзи ҳам фарзанд ва неваралари билан тикувчилик қилаётган опанинг ишлари таҳсинга лойиқ.

- Бир ойдан буён карантин талабларига қатъий амал қилган ҳолда уйимда “Уста-шогирд” асосида ёшлар ва келинларимга қуроқчилик сирларини ўргатяпман, - дейди Раҳима Ҳакимова. - Ўн нафар маҳалладошимга эса касаначилик асосида даромад келтирадиган иш ўрни ташкил қилдим. Улар қуроқчилик билан бирга тикувчилик билан ҳам шуғулланяпти. Биз тайёрлаётган маҳсулотларнинг харидори ўзимизнинг Иштихонда етарли.

Раҳима опа кўп йиллар алоқа хизмати соҳасида ишлаган, бу ҳунар тури билан эса ўн икки йилдан буён шуғулланади. У ва шогирдлари чиқит матолардан маҳорат билан тайёрлаётган рўзғорбоп қуроқдўзлик буюмлари ҳар қандай кишида “Инсон қўли мўъжиза яратади” деган фикрни уйғотади.

Дарвоқе, ҳунарманд мамлакатимизда карантин эълон қилинган илк кунлардан буён тиббий ниқоб тикиб, аҳолига бепул тарқатмоқда.