Андроид қурилмалар учун Zarnews.uz мобил иловаси. Юклаб олиш x

Икки нафар вояга етмаганларни жиноятга жалб қилиб, босқинчилик содир этган шахс ушланди

12 январь куни соат тахминан 02:00 ларда номаълум шахслар Тошкент вилояти, Чирчиқ шаҳри, 8-кичик ноҳия ҳудудида пиёда ўтиб кетаётган 43 ёшли З.Т.нинг орқа томонидан келиб, босқинчилик йўли билан эгнидаги курткасининг чўнтагидан 800.000 сўм пуллари ва бир дона “Samsung Galaxy J6 PRO” русумли уяли алоқа воситасини талон-торож қилиб, ҳодиса жойидан яширинишган.

Мазкур ҳолат юзасидан Чирчиқ шаҳар ИИБ ҳузуридаги тергов бўлими томонидан Ўзбекистон Республикаси Жиноят кодексининг 164-моддаси 2-қисми “б” банди билан жиноят иши қўзғатилган.

Олиб борилган тергов-тезкор ҳаракатлар натижасида ушбу жиноятни 20 ёшли фуқаро Р.Х. вояга етмаган 11 ёшли Б.Т. ва 12 ёшли Д.К.лар билан биргаликда, уларни жиноят содир этишга жалб қилган ҳолда содир этганлиги аниқланган. Р.Х.дан бир дона “Samsung Galaxy J6 PRO” русумли уяли алоқа воситаси ашёвий далил тариқасида расмийлаштириб олинган.

Терговда Р.Х. Ўзбекистон Республикаси Жиноят кодексининг 164-моддаси 2-қисми “б” банди (босқинчилик) ва 127-моддаси 3-қисми “б” банди (вояга етмаган шахсни ғайриижтимоий хатти-ҳаракатларга жалб қилиш) билан гумон қилинувчи тариқасида иштирок этишга жалб қилинган ҳамда процессуал тартибда ушланган.

Ўзбекистон Республикаси ИИВ ҳузуридаги Тергов департаменти хабарига кўра, ҳозирда дастлабки тергов ҳаракатлари олиб борилмоқда.