Самарқанддаги 1094 маҳалланинг 279 тасида мактабгача таълим ташкилоти мавжуд эмас

Вилоят мактабгача таълим бошқармаси бошлиғи Шуҳрат Раҳмонов шаҳар ва туманларда мактабгача таълим ташкилотлари фаолиятида юзага келаётган муаммолар ва уларни бартараф этиш чора-тадбирлари, нодавлат, давлат-хусусий шериклик асосидаги, оилавий ташкил этилаётган мактабгача таълим ташкилотларининг аҳволи ҳамда жорий йилнинг ярим йиллиги давомида тизимда амалга оширилган ишлар юзасидан ZOOM платформаси орқали оммавий ахборот ходимлари билан онлайн матбуот анжумани ўтказди.

Унда сўнгги уч йил вақт давомида тизимда 50 дан ортиқ норматив-ҳуқуқий ҳужжатлар қабул қилингани, таълим-тарбия сифати тубдан яхшилангани, соҳага замонавий таълим методлари кенг жорий қилингани, манзилли дастурлар доирасида мавжуд давлат боғчаларининг моддий-техник базаси тубдан янгиланаётгани борасида ахборот берилди.

- Бугун вилоятимиздаги 3-7 ёшгача бўлган болаларнинг 50 фоизидан ортиғи мактабгача таълим ташкилотларига қамраб олинган, - деди Ш.Раҳмонов. – Янги нодавлат, давлат-хусусий шерикчилик ва оилавий мактабгача таълим ташкилотларини ташкил этиш орқали болаларнинг боғчаларга қамровини оширишга ҳаракат қиляпмиз. Пандемия даврида ҳам мактабгача ёшдаги болаларни таълимга жалб этиш мақсадида “Онлайн” тартибда педагоглар ва ота-оналар гуруҳи ташкил этилиб, доимий машғулотлар олиб борилди. “Болажон” телеканали орқали бериб борилаётган, давлат дастури асосида тайёрланган «Илк қадам», (3-5 ёшлилар учун) ва «Ақлвой» (6 ёшлилар учун) кўрсатувлари болаларнинг оламни ўрганиш, ижодий ва таълим олиш, ўқиш ва мантиқий қобилиятларини ривожлантиришга қаратилган.

2020 йил 15 июндан бошлаб Республика махсус комиссиясининг қарорига мувофиқ, “яшил” ва “сариқ” ҳудудларда нодавлат мактабгача таълим ташкилотлари фаолиятига рухсат берилиши муносабати билан санитария-гигиена талабларига риоя қилган ҳолда 492 та нодавлат мактабгача таълим ташкилотлари босқичма-босқич фаолиятини бошлади.

Шунингдек, онлайн матбуот анжуманида вилоят бўйича жами 1094 та маҳаллалардан 279 тасида мактабгача таълим ташкилотлари мавжуд эмаслиги, тизимда олий маълумотли педагог кадрлар етишмаслиги, 2021-2023 йилларга мўлжалланган инвестиция, “Обод қишлоқ” ва “Обод маҳалла” дастурлари асосида босқичма-босқич режалаштирилган қурилиш-таъмирлаш ишлари, қамров фоизи ҳақида маълумотлар берилди.

Насиба ЖОНТЎРАЕВА.