Абитуриентларнинг ОТМга киришга тайёргарлик кўришлари учун «Онлайн-репетитор» телевизион дарслар намойиши бошланди
15 июндан бошлаб Халқ таълими вазирлиги, Давлат тест маркази ва Ўзбекистон миллий телерадиокомпанияси билан ҳамкорликда “Онлайн-репетитор” телевизион дарслар намойиш этиш бошланди.
Лойиҳа бу йил абитуриентларимизнинг олий ўқув юртига киришга тайёргарлик кўришлари учун қўшимча қулайлик яратиш мақсадида яратилди.
“Онлайн-репетитор” лойиҳаси доирасида абитуриентлар бу йилги тест синовлари ўтказиладиган барча фанлардан (12 та) намунавий тест саволларини ечиш усуллари билан танишади.
Тест саволлари Давлат тест марказининг мутахассислари (тестологлари) томонидан тайёрланган.
Телевизион дарслар бир ой давомида эфирга узатилади. “Онлайн-репетитор” дастурида тестлар ўзбек ва рус тилларида ҳар куни соат 9:00 дан 12:00 га қадар намойиш этилади. Эрталабки эфирни томоша қилишга имконияти бўлмаган абитуриентлар учун соат 16:00 дан бошлаб эфирни такрорий кўришлари мумкин.
Барча абитуриентларга онлайн-репетитор дастурларини кўришга имконият бўлиши учун фанлар 2 блокка ажратилган ҳолда намойиш этилади. Яъни, биринчи блокда аниқ ва табиий фанлар (математика, физика, кимё, биология, география), иккинчи блокда филология ва гуманитар фанлар (она тили, рус тили, тарих, инглиз тили, немис тили, француз тили) намойиш этилади.
Ҳар кунлик эфир жадвалларини ва телевизион дарсларни Сиз Халқ таълими вазирлиги ва Давлат тест марказининг расмий веб-сайти ва телеграм каналлари (www.uzedu.uz t.me/uzedu, t.me/uzeduonlinemaktab, fb.com/uzedu www.dtm.uz) орқали танишиб боришингиз мумкин.
