Abituriyentlarning OTMga kirishga tayyorgarlik ko‘rishlari uchun «Onlayn-repetitor» televizion darslar namoyishi boshlandi
15 iyundan boshlab Xalq ta’limi vazirligi, Davlat test markazi va O‘zbekiston milliy teleradiokompaniyasi bilan hamkorlikda “Onlayn-repetitor” televizion darslar namoyish etish boshlandi.
Loyiha bu yil abituriyentlarimizning oliy o‘quv yurtiga kirishga tayyorgarlik ko‘rishlari uchun qo‘shimcha qulaylik yaratish maqsadida yaratildi.
“Onlayn-repetitor” loyihasi doirasida abituriyentlar bu yilgi test sinovlari o‘tkaziladigan barcha fanlardan (12 ta) namunaviy test savollarini yechish usullari bilan tanishadi.
Test savollari Davlat test markazining mutaxassislari (testologlari) tomonidan tayyorlangan.
Televizion darslar bir oy davomida efirga uzatiladi. “Onlayn-repetitor” dasturida testlar o‘zbek va rus tillarida har kuni soat 9:00 dan 12:00 ga qadar namoyish etiladi. Ertalabki efirni tomosha qilishga imkoniyati bo‘lmagan abituriyentlar uchun soat 16:00 dan boshlab efirni takroriy ko‘rishlari mumkin.
Barcha abituriyentlarga onlayn-repetitor dasturlarini ko‘rishga imkoniyat bo‘lishi uchun fanlar 2 blokka ajratilgan holda namoyish etiladi. Ya’ni, birinchi blokda aniq va tabiiy fanlar (matematika, fizika, kimyo, biologiya, geografiya), ikkinchi blokda filologiya va gumanitar fanlar (ona tili, rus tili, tarix, ingliz tili, nemis tili, fransuz tili) namoyish etiladi.
Har kunlik efir jadvallarini va televizion darslarni Siz Xalq ta’limi vazirligi va Davlat test markazining rasmiy veb-sayti va telegram kanallari (www.uzedu.uz t.me/uzedu, t.me/uzeduonlinemaktab, fb.com/uzedu www.dtm.uz) orqali tanishib borishingiz mumkin.
