Ақлбовар қилмас рекордлар
Инсон танасининг жисмоний имкониятлари чексиз эканлигини одамлар аллақачон фаҳмлаб олишган. Мутахассислар бунинг илмий тасдиғини излаётган бир пайтда сайёрамизнинг ҳар хил бурчагидаги одамлар сўздан амалга ўтиб, ақлбовар қилмас турли рекордларни ўрнатиб келмоқда. Келинг, улардан қайси бири "Гиннеснинг рекордлар китоби"га киришга муваффақ бўлганини билиб оламиз.
Нафасни 24 дақиқа 11 сония ушлаб туриш
Расмий тиббиётга кўра, оддий одам кислородсиз 5 дақиқа, ғаввос – 9 дақиқа яшаши мумкин. Бу вақт тугаши билан танада қайтарилмас ўзгаришлар юзага келади, бу эса ўлимга олиб келиши мумкин.
Эркин ғаввослар бу ҳақда ҳеч нарса эшитмаганга ўхшайди. 2016 йилда испаниялик Алекс Сегура сув остида нафас олмасдан 24 дақиқа, 3 сония турди ва орадан икки йил ўтиб хорватиялик Будимир Шобат ундан 8 сония кўпроқ, 2021 йилда эса 24 соат 33 дақиқа туриб ўз рекордни қайта янгилаганини қандай изоҳлаш мумкин? Бундан ташқари, ғаввослар шўнғиш пайтида бутунлай ҳаракатсиз ҳолатда бўлади. Балки шу “ҳийлалар” уларга ушбу рекордни амалга оширишга имкон бергандир...
Бир вақтнинг ўзида инсон танасида ўтирган энг кўп асаларилар сони
Ота-оналар ҳар бир болага асаларига яқинлашса, улар чақиши мумкинлиги ҳақида огоҳлантиришади. Одатда бу ҳақиқат одамларни ҳашаротлардан узоқроқ туришга мажбур қилади, бироқ Хитойлик Гао Бинг тизимга қарши чиқишга қарор қилди.
2014 йилда бу жасур одам бир соат давомида бир вақтнинг ўзида танасининг юзасида жойлашиб олган 1 миллион 100 та асаларининг вақтинчалик уйига айланди. Тирик кийимнинг вазни 109 килограммни ташкил этди. Афсуски, тажриба давомида тишлайдиган “костюм” Бингони тахминан икки минг марта чақди. Шунга қарамасдан у мақсадига эришди ва Гаонинг ютуғи "Гиннеснинг рекордлар китоби" вакиллари томонидан қайд этилди.
189 тонналик ҳарбий самолётни шатакка олиш
2009 йилда канадалик Кевин Фаст оғирлиги 189 тонна бўлган “CC-177 Globemaster III" ҳарбий самолётини жойидан қўзғатишга қарор қилди. Натижада у самолётни деярли 9 метрга силжитиб, ўз олдига қўйган вазифани бажарди. Фаст рекордлар ўрнатиш орқали ишлаб топган пулини барча муҳтожларга хайрия сифатида тарқатади.
7,6 километр баландликдан парашютсиз сакраш
Америкалик парашютчи Люк Эйкинс 7,6 километр баландликдан парашютсиз сакраб, жаҳон рекордини ўрнатди. Бундай баландликдан сакраш ва ўлмаслик учун Эйкинс ердан анча баланддаги қурилиш кранларида мутахассислар ён томонларига ёриткич лампалари ўрнатиб чиққан, ҳажми футбол майдонининг 1/3 қисмини ташкил қиладиган чўзилган тўр устига тушиши керак эди.
Икки дақиқа давом этган парвоздан сўнг Эйкинс тўрга муваффақиятли қўнди ва ақл бовар қилмас ғоясини амалга ошириб янги жаҳон рекорди сифатида қайд этди.
Ҳар куни оддий одамлар биз имкони йўқ деб ўйлаган нарсаларга тобелигимизни исботлаб келмоқдалар. Бунга ишониш қийин бўлса-да, асосийси, улар мақсадларига эришиб, ўзига бўлган ишончни оқлаб келаётган бўлса, ажабмас.
Баҳора Муҳаммадиева тайёрлади.
