АҚШ ва «кўнгиллилар коалицияси» Парижда нималарни келишди?
Сулҳдан кейин Британия ва Франция Украинага қўшин юборади(ми?)
Франция ва Буюк Британия Россия-Украина уруши тугаганидан сўнг тинчликни таъминлаш мақсадида Украинага қўшин юбориш ниятини билдирди. Тинчликпарвар контингент жўнатилишини назарда тутувчи келишув Парижда ўтган «кўнгиллилар коалицияси» саммитида иштирок этган Франция президенти Эммануэль Макрон, Буюк Британия бош вазири Кир Стармер ҳамда Украина президенти Владимир Зеленский томонидан имзоланди.
Саммит иштирокчилари, жумладан, АҚШ президентининг махсус вакиллари Стив Уиткофф ва Жаред Кушнер ҳам «Париж декларацияси»ни имзоладилар. Ушбу ҳужжатда Украинага хавфсизлик кафолатларини таъминлаш нияти баён этилган.
Музокараларда 30 га яқин давлат вакиллари иштирок этди. Улар орасида Буюк Британия бош вазири Кир Стармер, Польша бош вазири Дональд Туск, Европа комиссияси раиси Урсула фон дер Ляйен, НАТО бош котиби Марк Рютте ва бошқалар бор.
Париждаги саммит АҚШ президенти Дональд Трамп ва Украина президенти Владимир Зеленский ўртасида бўлиб ўтган музокаралардан кўп ўтмай ташкил этилди. Янги йил арафасида улар АҚШ президентининг Флорида штатининг Мар-а-Лаго қароргоҳида учрашган эди.
Трамп ва Зеленский Украинадаги урушни якунлаш режасини муҳокама қилдилар. Бу режа дастлаб Вашингтон томонидан ишлаб чиқилган бўлиб, бир қатор халқаро саммитлар давомида бир неча бор ўзгартирилган.
Флоридадаги учрашувдан сўнг иштирокчилар АҚШ томонидан Украинага хавфсизлик кафолатлари бериш бўйича келишувга эришилганини маълум қилди. Бироқ асосий ҳал этилмаган масала қолди. Бу эса Россиянинг Украина қўшинларини Киев назоратидаги Донецк вилояти ҳудудидан олиб чиқиш талабидир.
Владимир Зеленскийнинг айтишича, тинчлик режа 90 фоизга келишилган. Бироқ энг катта ихтилофлар ҳудудлар масаласида сақланиб қолмоқда.
