Экологик коррупция нима?

Самарқанд шаҳрида “Ўзбекистонда экологик коррупция: Коррупция схемаларини фош этиш” мавзусида семинар-тренинг ташкил қилинди.

Икки кун давом этган тренингда "Экологик коррупция нима?", "Экологик коррупцияни текшириш усуллари, қонунчилик ва экология соҳасидаги жиноятлар учун жавобгарликлар" каби мавзуларда тушунчалар берилди.

-  Бу тренинг жуда зарур, чунки экологик коррупция нима эканлигини кўпчилик журналист, блогер ва аҳоли ҳам тушунмайди, - дейди тренер Наргиз Қосимова. - Коррупция ҳақида билишади, лекин айнан экологик коррупция бу алоҳида бир йўналиш.   Экологик муаммоларни яхши тушунмаган журналист ва блогерлар экокоррупцияни кўра олишмайди. Масалан, мораторий эълон қилинишига қарамасдан дарё ўзанларидан қум, шағал қазиб олиш, қурилиш вақтида дарахтларни ноқонуний кесиш ёки атмосферани бошқа томондан ифлослантирилиши, яъни ҳавога зарарли моддалар чиқарувчи корхоналар фильтр қўймасдан ишлаши ва ҳоказо. Экологик коррупция нафақат табиатга зарар етказади, бу бевосита экологик қонунчиликни бузилишини яққол кўриниши ҳисобланади.

Мазкур тренинг аслида хамма вилоятларда ўтказилиши шарт, лекин фақат Самарқанд ва Наманган вилоятларини танлаб олдик. Чунки Самарқанд вилоятида Зарафшон дарёсида ноқонуний қум-шағал қазиб олинишлар кўп қайд этилган. Зеро, лойиҳани асосий мақсади ҳам журналист ва блогерларнинг экологик коррупция муаммоларини аниқлаш, ёритиш ва таҳлил қилиш борасида билим ва амалий куникмаларини ривожлантиришдан иборат.

Муниса Шамсиева.