Қайси мамлакатларда “водопровод”дан сув ичиш мумкин?
Дунёнинг турли минтақаларида қувурдан таъминланадиган ичимлик сувининг сифати бир-биридан кескин фарқ қилади. Ушбу мақолада қайси мамлакатларда қўрқмасдан “водопровод” сувини ичиш мумкин ва қайсисида ҳатто тишларни ювмаслик кераклиги ҳақида сўзи юритамиз.
Кран суви сифати ўлчанадиган ягона глобал стандарт мавжуд эмас. Кўпгина мамлакатларнинг Жаҳон соғлиқни сақлаш ташкилоти (ЖСС) тавсияларига асосланган ичимлик сувидаги бактериялар, вируслар каби ифлослантирувчи моддаларнинг рухсат этилган максимал даражасини белгилайдиган ўз стандартлари бор.
Қувурдан келадиган сувларнинг сифатига манбалар (дарёлар, кўллар, сув омборлари, ер ости сувлари, музликлар, ёмғир сувлари ва бошқалар), тозалаш технологиялари ва сувни тозалаш иншоотидан истеъмолчига етказиб бериш каби омиллар ҳам таъсир қилади.
Агар тозалаш инфратузилмаси унча пухта ривожланманган ёки таъминот тизими такомиллашмаган бўлса, водопровод сувини ичиш у ёқда турсин, ҳатто тиш ювиш ҳам инсон учун хавфли бўлиши мумкин. Ҳатто маҳаллий аҳоли истеъмол қилса-да, нотаниш патогенлар туфайли бундай сув сайёҳлар учун муаммо туғдириши мумкин.
Сув сифати қандай баҳоланади?
Аксарият экспертлар иккита манба - АҚШ Йельс университети тадқиқоти (Атроф-муҳит самарадорлиги индекси) ва АҚШ Касалликларни назорат қилиш ва олдини олиш марказлари (CDC) тавсияларига таянади.
Атроф-муҳит самарадорлиги индексига кўра, крандан ичиш мумкин бўлган энг хавфсиз сув Ғарбий Европанинг кўпгина мамлакатлари, Австралия ва Янги Зеландия, Канада ва АҚШда бор. Шунингдек, энг тоза “водопровод” сувини Австрия, Финландия, Греция, Исландия, Ирландия, Шимолий Ирландия, Мальта, Нидерландия, Норвегия, Швейцария ва Буюк Британия аҳолиси ичади. Ушбу мамлакатларнинг баъзиларида сув шунчалик тозаки, шиша сув асосан сайёҳларга сотилади. Мисол учун, Исландияда бутилкалардаги ёрлиқ инглиз тилида ёзилган, чунки маҳаллий аҳоли фақат “водопровод” сувини ичади.
Саёҳатчиларга қуйидаги мамлакатлардаги “водопровод” сувини ичиш тавсия этилмайди:
Осиё (Япония ва Жанубий Кореядан ташқари), Жанубий Америка (Чилидан ташқари), Марказий Америка (Коста-Рикадан ташқари). Шунингдек, Туркия, Тунис, Миср, Иордания, Марокаш, Сейшел ороллари, Маврикий, Мальдив ороллари, Вьетнам, Индонезия, Таиланд, Черногория, Хитой, Ҳиндистон, Куба ва Сербия давлатларида кран сувини ичиб бўлмайди. Сув сифатининг пастлиги шунингдек, Яқин Шарқ (Баҳрайн, Қувайт, БАА ва Саудия Арабистонидан ташқари), Африка (бутун қитъа) каби мамлакатларга хос.
Йельс университети мутахассислари ва CDC деярли барча “постсовет” мамлакатларида, шу жумладан Россияда ҳам қайнатилмаган “водопровод” сувини ичишни тавсия қилмайди.
Баҳора Муҳаммадиева тайёрлади.
