Самарқандлик йигит 16 минг долларни букмеккерлик сайтида ҳавога совурди

У шунингдек, танишининг "Дамас"ини ҳам арзон нархга сотиб, пулини шахсий эҳтиёжларига ишлатиб юборган.

Шу йил май ойида 26 ёшли С.Ф. 28 ёшли таниши Х.Ш.нинг ишончига кириб, унга салқин ичимликлар савдоси билан шуғулланиш ва фойда кўришни таклиф қилган. Бунинг учун 16 000 АҚШ доллари миқдоридаги пулларини алдов йўли билан қўлга киритган.

Шундан сўнг, ушбу пулларни «1хбет» букмеккерлик сайтида мавжуд ўйинларга тикиб, ютқазиб қўйган. У бугунги кунга қадар Х.Ш.нинг пулларини қайтариб бермасдан, алдаб келган.

Бундан ташқари, С.Ф. таниши Т.Ж.га тегишли «Дамас» русумли автомашинани пулларини бўлиб тўлаб бериш шарти билан 9 000 АҚШ долларига харид қилган. Автомашинани бироз муддат бошқариб, бошқа бир шахсни автомашина ўзига тегишли эканлигига ишонтириб, унга 6 200 АҚШ долларига сотган. Пулларни эса ўзининг шахсий эҳтиёжлари учун ишлатиб юборган.

Юқоридаги ҳолатлар ҳуқуқ-тартибот идоралари томонидан аниқланди ва бу иш юзасидан С.Ф.га нисбатан Жиноят кодексининг 168-моддаси 4-қисми «а» банди (фирибгарлик) билан жиноят иши қўзғатилган.

Ҳозирда дастлабки тергов давом этмоқда.