Samarqandlik yigit 16 ming dollarni bukmekkerlik saytida havoga sovurdi

U shuningdek, tanishining "Damas"ini ham arzon narxga sotib, pulini shaxsiy ehtiyojlariga ishlatib yuborgan.

Shu yil may oyida 26 yoshli S.F. 28 yoshli tanishi X.Sh.ning ishonchiga kirib, unga salqin ichimliklar savdosi bilan shug‘ullanish va foyda ko‘rishni taklif qilgan. Buning uchun 16 000 AQSh dollari miqdoridagi pullarini aldov yo‘li bilan qo‘lga kiritgan.

Shundan so‘ng, ushbu pullarni «1xbet» bukmekkerlik saytida mavjud o‘yinlarga tikib, yutqazib qo‘ygan. U bugungi kunga qadar X.Sh.ning pullarini qaytarib bermasdan, aldab kelgan.

Bundan tashqari, S.F. tanishi T.J.ga tegishli «Damas» rusumli avtomashinani pullarini bo‘lib to‘lab berish sharti bilan 9 000 AQSh dollariga xarid qilgan. Avtomashinani biroz muddat boshqarib, boshqa bir shaxsni avtomashina o‘ziga tegishli ekanligiga ishontirib, unga 6 200 AQSh dollariga sotgan. Pullarni esa o‘zining shaxsiy ehtiyojlari uchun ishlatib yuborgan.

Yuqoridagi holatlar huquq-tartibot idoralari tomonidan aniqlandi va bu ish yuzasidan S.F.ga nisbatan Jinoyat kodeksining 168-moddasi 4-qismi «a» bandi (firibgarlik) bilan jinoyat ishi qo‘zg‘atilgan.

Hozirda dastlabki tergov davom etmoqda.