Davlat xizmatida yangi davr: endi ishga “tanish-bilish” emas, bilim bilan kiriladi
Prezidentimiz joriy yil 19 iyunda yangi farmon qabul qildi. Bu hujjat bilan davlat xizmatchilari faoliyatida professionallik, halollik va samaradorlikni oshirishga yo‘naltirilgan yangi tizim yo‘lga qo‘yiladi.
Oddiy qilib aytganda, bu farmon davlat xizmatida “eski odatlar” bilan xayrlashib, zamonaviy, ochiq va natijaga qaragan tizimni yaratishni ko‘zlaydi.
Nega bu o‘zgarish kerak edi?
Hamma bilgan haqiqat: ba’zan davlat idoralarida ish yuritish cho‘zilib ketadi, ayrim xodimlar mas’uliyatsizlik qiladi, kimdir lavozimga bilim emas, tanish orqali chiqib oladi.
Shunday holatlar davlatga ham, xalqqa ham zarar.
Shuning uchun endi davlat xizmatiga kirishda tanlov va adolat asosiy mezon bo‘ladi. Hech kim “tavsiya bilan” ishga kira olmaydi, faqat bilim va qobiliyati bilan.
Yangi tizim nima beradi?
Farmonda xalq uchun yaqqol his etiladigan bir nechta yangiliklar bor.
Jumladan, har bir davlat idorasida bo‘sh ish o‘rni ochiq e’lon qilinadi. Har kim onlayn tizim orqali hujjat topshira oladi. Tanlov va testlar shaffof tarzda, maxsus kuzatuv tizimi orqali o‘tkaziladi.
Davlat xizmatchilari doim o‘qib turadi
Ishga kirgan odam “bir umr shu bilim bilan ishlab ketadi”, degan zamon o‘tdi. Endi har bir xizmatchi malakasini oshirib borishi shart. Ular uchun akademiya, malaka kurslari, xorijiy stajirovkalar tashkil etiladi.
Ayollar uchun keng imkoniyatlar
Farmonda xotin-qizlarni rahbarlik lavozimlariga tayyorlash va ular uchun qulay sharoitlar yaratishga katta ahamiyat berilgan. Endi davlat idoralarida ayol rahbarlar soni sezilarli ko‘payishi kutilmoqda.
Raqamlashtirish — shaffoflik garovi
Barcha jarayonlar — qabul, baholash, rag‘batlantirish raqamli platforma orqali amalga oshiriladi. Bu tizim odamlar orasidagi ta’sirni cheklaydi va halollikni ta’minlaydi.
Yaxshi ishlagan rag‘batlantiriladi
Endilikda faqat ishga kelib ketish emas, natija ham muhim. Kim yaxshi ishlasa, uning mehnati mukofotlanadi — maosh qo‘shimchalari, malaka oshirish imkoni, lavozim o‘sishi kabi yo‘llar bilan.
Yangi avlod rahbarlari
Farmon asosida “TOP–100” dasturi yo‘lga qo‘yiladi. Bu dastur orqali eng iqtidorli va tashabbuskor xizmatchilar tanlab olinadi. Ular maxsus o‘quv kurslariga yuboriladi, xorijda tajriba orttiradi, keyinchalik yetakchi rahbarlar qatoriga kiradi.
Ya’ni, davlat boshqaruviga zamonaviy fikrlaydigan, bilimli yoshlar kelishi uchun yo‘l ochiladi.
Korrupsiyaga qarshi qat’iy nazorat
Farmonning muhim jihatlaridan biri — halollik va shaffoflik. Davlat xizmatchilari va rahbarlar korrupsiya xavfiga nisbatan maxsus baholashdan o‘tadi. Ular haqidagi ma’lumotlar ochiq bo‘ladi, faoliyati doim nazoratda bo‘ladi.
Bu orqali “ishni pul bilan hal qilish” yoki “tanish bilan kirish” kabi illatlarga chek qo‘yiladi.
Davlat xizmatchisi — el xizmatida
Eng asosiysi, davlat xizmatchisining imiji o‘zgaradi. Farmonga ko‘ra, xizmatchilar uchun qulay ish sharoiti yaratiladi, ularning oilasi va sog‘lig‘iga ham e’tibor qaratiladi. Har yili “Davlat xizmatchilari kuni” nishonlanadi, faxriylar e’zozlanadi.
Bu nafaqat ish samaradorligini oshiradi, balki davlat xizmatini obro‘li kasbga aylantiradi.
Xulosa
Yangi farmon davlat xizmatiga yangi ruh, yangi mazmun olib kirmoqda. Endi bu tizimda ishlash faqat ish joyi emas, balki xalqqa xizmat qilish mas’uliyati hisoblanadi.
Davlat xizmatchisi endi qo‘rquv yoki buyruq bilan emas, ishonch va bilim bilan ishlaydigan shaxs bo‘lishi kerak. Ana shunda xalq ham, davlat ham yutqazmaydi.
Elyor Ulug‘murodov,
xalq deputatlari viloyat Kengashi deputati.
