Саммит кунлари электр энергиядан муаммо бўлмайди
Бугун Самарқанд шаҳрида “Марказий Осий – Европа иттифоқи” биринчи расмий саммити ва “Марказий Осиё глобал иқлим таҳдидлари қаршисида: умумий фаровонлик йўлида бирдамлик” мавзусидаги халқаро тадбир ўз ишини бошлайди.
Ушбу халқаро саммитга пухта тайёргарлик кўрилди. Тадбир доирасида ташкил этиладиган форумлар, конференциялар ўтадиган бино ва иншоотлар ҳамда меҳмонлар ташриф буюрадиган тарихий обидаларни барқарор электр энергияси билан таъминлаш мақсадида “Ҳудудий электр тармоқлари” АЖ ва унинг Самарқанд ҳудудий филиали томонидан барча зарур чоралар кўрилган.
Филиал ахборот хизмати маълумотига кўра,, тадбир ўтказиладиган объектларни электр энергияси билан таъминловчи 14 та подстанция, 5 та тақсимлаш тармоғи, 64 та трансформатор пункти ҳамда 525,1 километр узунликдаги электр узатиш тармоқлари навбатдан ташқари кўрикдан ҳамда тепловизор назоратидан ўтказилди.
Йирик 35-110 кВ “Л-Афросиёб”, “Л-Чўпонота”, “Л-Шимолий”, “Л-Марказий-1,2” ва “Л-Ғарбий-1,2” ҳаво электр узатиш тармоқлари ҳам техник кўрикдан ўтказилиб, аниқланган камчиликларни бартараф этиш ишлари олиб борилди. Шунингдек, “Регистон” нимстанциясидан чиқувчи 322-, 321-, 312-фидерларидан “РП-Оқсарой” ва “Кўксарой” тармоқларигача 6 кВ 1,5 километр ҳаво тармоғи ва 1 километрга яқин ер ости кабель тармоғи тортиш ишлари амалга оширилди.
Самарқанд шаҳридаги тарихий обида ва зиёратгоҳларни электр энергияси билан таъминловчи 16 та трансформатор пунктларининг электр қурилмалари навбатдан ташқари кўрик ва синовдан ўтказилиб, 3 та трансформатор пунктларида электр қурилмалари янгитдан ўрнатилди. Бундан ташқари, кўча ёриткичларини электр энергияси билан таъминлайдиган 45 та трансформатор пунктини ҳам техник кўрик ва тепловизор назоратидан ўтказиш ишлари амалга оширилди.
Шунингдек, саммит ўтказилиши муносабати билан “Ҳудудий электр тармоқлари” АЖ Самарқанд ҳудудий филиалига 10 дона “Дамас” русумли автомашина ва 3 дона "ISUZU" русумли махсус техника ҳамда махсус электр қурилмалари билан жиҳозланган автобус олиб келинди. 8 та тезкор хизмат кўрсатиш бригадалари зарур захира материаллари билан таъминланиб, шай ҳолатга келтирилди. Малакали мутахассисларнинг туну кун навбатчилиги ташкил этилди.
