Sammit kunlari elektr energiyadan muammo bo‘lmaydi
Bugun Samarqand shahrida “Markaziy Osiy – Yevropa ittifoqi” birinchi rasmiy sammiti va “Markaziy Osiyo global iqlim tahdidlari qarshisida: umumiy farovonlik yo‘lida birdamlik” mavzusidagi xalqaro tadbir o‘z ishini boshlaydi.
Ushbu xalqaro sammitga puxta tayyorgarlik ko‘rildi. Tadbir doirasida tashkil etiladigan forumlar, konferensiyalar o‘tadigan bino va inshootlar hamda mehmonlar tashrif buyuradigan tarixiy obidalarni barqaror elektr energiyasi bilan ta’minlash maqsadida “Hududiy elektr tarmoqlari” AJ va uning Samarqand hududiy filiali tomonidan barcha zarur choralar ko‘rilgan.
Filial axborot xizmati ma’lumotiga ko‘ra,, tadbir o‘tkaziladigan ob’yektlarni elektr energiyasi bilan ta’minlovchi 14 ta podstansiya, 5 ta taqsimlash tarmog‘i, 64 ta transformator punkti hamda 525,1 kilometr uzunlikdagi elektr uzatish tarmoqlari navbatdan tashqari ko‘rikdan hamda teplovizor nazoratidan o‘tkazildi.
Yirik 35-110 kV “L-Afrosiyob”, “L-Cho‘ponota”, “L-Shimoliy”, “L-Markaziy-1,2” va “L-G‘arbiy-1,2” havo elektr uzatish tarmoqlari ham texnik ko‘rikdan o‘tkazilib, aniqlangan kamchiliklarni bartaraf etish ishlari olib borildi. Shuningdek, “Registon” nimstansiyasidan chiquvchi 322-, 321-, 312-fiderlaridan “RP-Oqsaroy” va “Ko‘ksaroy” tarmoqlarigacha 6 kV 1,5 kilometr havo tarmog‘i va 1 kilometrga yaqin yer osti kabel tarmog‘i tortish ishlari amalga oshirildi.
Samarqand shahridagi tarixiy obida va ziyoratgohlarni elektr energiyasi bilan ta’minlovchi 16 ta transformator punktlarining elektr qurilmalari navbatdan tashqari ko‘rik va sinovdan o‘tkazilib, 3 ta transformator punktlarida elektr qurilmalari yangitdan o‘rnatildi. Bundan tashqari, ko‘cha yoritkichlarini elektr energiyasi bilan ta’minlaydigan 45 ta transformator punktini ham texnik ko‘rik va teplovizor nazoratidan o‘tkazish ishlari amalga oshirildi.
Shuningdek, sammit o‘tkazilishi munosabati bilan “Hududiy elektr tarmoqlari” AJ Samarqand hududiy filialiga 10 dona “Damas” rusumli avtomashina va 3 dona "ISUZU" rusumli maxsus texnika hamda maxsus elektr qurilmalari bilan jihozlangan avtobus olib kelindi. 8 ta tezkor xizmat ko‘rsatish brigadalari zarur zaxira materiallari bilan ta’minlanib, shay holatga keltirildi. Malakali mutaxassislarning tunu kun navbatchiligi tashkil etildi.
