ТАТУ Самарқанд филиалида дастурчи талаба қизлар ўртасида “Coder Girls” мусобақаси ўтказилди
Тошкент ахборот технологиялари университети Самарқанд филиалида олий таълим муассасаларининг талаба қизлари ўртасида дастурлаш бўйича “Coder Girls” мусобақаси бўлиб ўтди.
Мазкур мусобақа 5 та муҳим ташаббуснинг учинчи йўналиши - “Аҳоли ва ёшлар ўртасида компьютер технологиялари ва интернетдан самарали фойдаланишни ташкил этиш”га қаратилган бўлиб, мусобақада Самарқанд давлат университети, Ўзбекистон миллий университети Жиззах филиали, Тошкент давлат иқтисодиёт университети Самарқанд филиали, ТАТУ Самарқанд филиалининг иқтидорли ва фаол дастурчи талаба қизлари иштирок этди.
Унда иштирокчилар дастурлашга доир берилган топшириқлар бўйича ўз иқтидор ва лойиҳаларини намойиш этди.
Мусобақада Самарқанд давлат университетининг рақамли технологиялар факультети 2-босқич талабалари - Маҳбуба Салимова, Гулҳаё Ҳамзаева ва Гулноза Ибрагимовалар мос ҳолда биринчи, иккинчи ва учинчи ўринларни эгаллади.
Беллашув ниҳоясида ғолиблар эсдалик совға, диплом ҳамда сертификатлар билан тақдирланди.
ТАТУ Самарқанд филиали ахборот хизмати.
