TATU Samarqand filialida dasturchi talaba qizlar o‘rtasida “Coder Girls” musobaqasi o‘tkazildi
Toshkent axborot texnologiyalari universiteti Samarqand filialida oliy ta’lim muassasalarining talaba qizlari o‘rtasida dasturlash bo‘yicha “Coder Girls” musobaqasi bo‘lib o‘tdi.
Mazkur musobaqa 5 ta muhim tashabbusning uchinchi yo‘nalishi - “Aholi va yoshlar o‘rtasida kompyuter texnologiyalari va internetdan samarali foydalanishni tashkil etish”ga qaratilgan bo‘lib, musobaqada Samarqand davlat universiteti, O‘zbekiston milliy universiteti Jizzax filiali, Toshkent davlat iqtisodiyot universiteti Samarqand filiali, TATU Samarqand filialining iqtidorli va faol dasturchi talaba qizlari ishtirok etdi.
Unda ishtirokchilar dasturlashga doir berilgan topshiriqlar bo‘yicha o‘z iqtidor va loyihalarini namoyish etdi.
Musobaqada Samarqand davlat universitetining raqamli texnologiyalar fakulteti 2-bosqich talabalari - Mahbuba Salimova, Gulhayo Hamzayeva va Gulnoza Ibragimovalar mos holda birinchi, ikkinchi va uchinchi o‘rinlarni egalladi.
Bellashuv nihoyasida g‘oliblar esdalik sovg‘a, diplom hamda sertifikatlar bilan taqdirlandi.
TATU Samarqand filiali axborot xizmati.
