Ургутда бўлиб ўтган сайёр қабулда газга оид 100 га яқин мурожаат тушди

“Ҳудудгаз Самарқанд” газ таъминоти филиали раҳбари Ансор Муҳаммадиев Ургут туманида яшовчи табиий ва суюлтирилган газ истеъмолчилар учун сайёр қабул ўтказди.

Учрашувда Баҳрин маҳалласи раиси Дилшод Саидовнинг маҳалладаги кам таъминланган оилалар учун маиший газ баллон ажратишга ёрдам сўраб қилган мурожаати масъуллар томонидан ўрганилиб, тез орада ижобий ҳал этилишига ваъда берилди.

Ибн Сино маҳалласида яшовчи Люба Усмонова эса, маиший газ баллон сўраб мурожаат қилди. Ушбу мурожаатни 3 кун ичида ҳал этиш бўйича жойида мутасаддиларга вазифалар берилди.

Мирзақишлоқ маҳалласидан келган Мубаро Махматқулова бошчилик бир гуруҳ аёллар ўзлари яшаётган маҳаллада канал ёқалаб ўтган 1,5 км газ қувурини юқорига кўтариб беришда амалий кўмак сўраб мурожаат қилишди. Мурожаатчиларнинг айтишича, ҳудудда фермерлар ариқ қазиш жараёнида газ қувурлари сувга яқин бўлиб қолганлиги сабабли қиш кунлари ҳудудда газ босими кескин пасайиб кетмоқда. Учрашувда мазкур масала мутасаддилар томонидан ўрганилиб чиқилгач, хулоса берилиши ва амалий кўмак кўрсатилиши маълум қилинди. Сайёр қабул давомида 100 га яқин мурожаатлар келиб тушди. Мурожаатларнинг аксарияти жойида ҳал этилган бўлса, айримларини ўрганиш бўйича масъулларга вазифалар топширилди.

“Hududgaz Samarqand” газ таъминоти филиали матбуот хизмати.