Urgutda bo‘lib o‘tgan sayyor qabulda gazga oid 100 ga yaqin murojaat tushdi
“Hududgaz Samarqand” gaz ta’minoti filiali rahbari Ansor Muhammadiyev Urgut tumanida yashovchi tabiiy va suyultirilgan gaz iste’molchilar uchun sayyor qabul o‘tkazdi.
Uchrashuvda Bahrin mahallasi raisi Dilshod Saidovning mahalladagi kam ta’minlangan oilalar uchun maishiy gaz ballon ajratishga yordam so‘rab qilgan murojaati mas’ullar tomonidan o‘rganilib, tez orada ijobiy hal etilishiga va’da berildi.
Ibn Sino mahallasida yashovchi Lyuba Usmonova esa, maishiy gaz ballon so‘rab murojaat qildi. Ushbu murojaatni 3 kun ichida hal etish bo‘yicha joyida mutasaddilarga vazifalar berildi.
Mirzaqishloq mahallasidan kelgan Mubaro Maxmatqulova boshchilik bir guruh ayollar o‘zlari yashayotgan mahallada kanal yoqalab o‘tgan 1,5 km gaz quvurini yuqoriga ko‘tarib berishda amaliy ko‘mak so‘rab murojaat qilishdi. Murojaatchilarning aytishicha, hududda fermerlar ariq qazish jarayonida gaz quvurlari suvga yaqin bo‘lib qolganligi sababli qish kunlari hududda gaz bosimi keskin pasayib ketmoqda. Uchrashuvda mazkur masala mutasaddilar tomonidan o‘rganilib chiqilgach, xulosa berilishi va amaliy ko‘mak ko‘rsatilishi ma’lum qilindi. Sayyor qabul davomida 100 ga yaqin murojaatlar kelib tushdi. Murojaatlarning aksariyati joyida hal etilgan bo‘lsa, ayrimlarini o‘rganish bo‘yicha mas’ullarga vazifalar topshirildi.
“Hududgaz Samarqand” gaz ta’minoti filiali matbuot xizmati.
