Вилоят сектор раҳбарлари жамоаси ҳоким кубоги соҳиби

Хабар берганимиздек, Самарқанд шаҳридаги Сартепа спорт ўйингоҳида вилоят ҳамда шаҳар, туманлар сектор раҳбарлари ва уларнинг ўринбосарлари ўртасида мини футбол бўйича “Вилоят ҳокими кубоги” мусобақаларининг финал баҳслари бўлиб ўтди.

Муросасиз ўтган баҳсларнинг учинчи ўрин учун кечган беллашувида Иштихон тумани сектор раҳбарлари жамоаси Ургут тумани жамоаси устидан 2:0 ҳисобида ғалаба қозониб, учинчи ўринни қўлга киритди.

Мусобақанинг финал баҳсида вилоят сектор раҳбарлари жамоаси Тойлоқ тумани жамоасини 4:1 ҳисобида енгди ва "Вилоят ҳокими кубоги" соҳиби бўлди.

Мусобақанинг тақдирлаш маросимида вилоят ҳокими Эркинжон Турдимов иштирок этиб, бу каби мусобақалар давлат идоралари раҳбар ходимлари ўртасида соғлом турмуш тарзи ва спортни кенг тарғиб қилиш, уларнинг ҳамкорлигини янада мустаҳкамлашга хизмат қилишини таъкидлади.

Ғолиб жамоаларга кубок ва эсдалик совғалари шунингдек, "Энг фаол ҳужумчи", "Энг яхши дарвозабон", "Энг яхши ҳимоячи" номинациялари бўйича ғолиблар тақдирланди.

Фазлиддин Рўзибоев.