Юртимизда коронавирус инфекциясига чалинган 30 нафар ҳомиладор аёлдан 22 нафари бутунлай соғайди

Юртимизда коронавирус инфекциясига гумонланган фуқаролар ёки ушбу касалликка чалинган беморлар, жумладан,  ҳомиладор, туғруқдаги ва туққан аёлларни даволашга ҳам  алоҳида аҳамият берилмоқда. Уларга коронавирус инфекцияси ташхисини қўйиш ва даволашда Жаҳон соғлиқни сақлаш ташкилотининг тавсиялари асосида ягона тизим ҳамда услубий ёндашув жорий этилган.

Соғлиқни сақлаш вазирлиги бошқарма бошлиғи Барно Абдусаматованинг таъкидлашича, коронавирус инфекцияси тарқалишининг олдини олиш бўйича карантин эълон қилинган кундан айни пайтга қадар жами 1961 нафар ҳомиладор аёл карантин назоратига олинган. Ҳудудлар кесимида оладиган бўлсак,

Наманган вилоятида 1229 нафар,

Самарқанд вилоятида 238 нафар,

Тошкент шаҳрида 134 нафар,

Тошкент вилоятида 129 нафар,

 Фарғона вилоятида 72 нафар,

 Сурхондарё вилоятида 48 нафар,

Қашқадарё вилоятида 36 нафар,

 Қорақалпоғистон Республикасида 34 нафар,

Хоразм вилоятида 27 нафар,

Бухоро вилоятида 11 нафар,

Жиззах вилоятида эса 3 нафарни

ташкил этади. Коронавирус инфекцияси бўйича карантин назоратига олинган ва тиббий ёрдамга муҳтож бўлган 338 нафар ҳомиладор аёлга шошилинч тиббий ёрдам кўрсатилган. Ўтган даврда жойларда жами 30 нафар ҳомиладор аёлда коронавирус инфекцияси аниқланган. Жумладан,

Тошкент шаҳрида 7 нафар,

Наманган вилоятида 5 нафар,

Самарқанд вилоятида 5 нафар

Бухоро вилоятида 3 нафар,

Қорақалпоғистон Республикасида 3 нафар,

Андижон вилоятида 2 нафар,

Фарғона вилоятида  2 нафар,

Тошкент вилоятида 2 нафар,

Хоразм вилоятида 1 нафар

қайд этилган. Эътиборли жиҳати, айни пайтда коронавирус инфекциясига чалинган ҳомиладорлардан 22 нафари бутунлай соғайган. Қолган 8 нафарида самарали даволаш муолажалари олиб борилмоқда.

Эслатиб ўтамиз, Соғлиқни сақлаш вазирлиги томонидан ҳомиладорларга ўз вақтида сифатли ихтисослаштирилган тиббий ёрдам кўрсатиш учун 340 шифо ўринга эга 13 та туғруқ комплекслари ҳамда инфекция билан касалланганлар билан мулоқотда бўлган ҳомиладор аёлларни стационар карантини  учун эса 740 шифо ўринга эга 14 та туғруқ комплекслари фаолияти йўлга қўйилган.

Соғлиқни сақлаш вазирлиги

Жамоатчилик билан алоқалар бўлими.