52,3 миллиард сўмлик кредит талон-торожликлари бўйича 114 та жиноят иши қўзғатилган
9 декабрь – Халқаро коррупцияга қарши кураш куни. Ушбу сана муносабати билан “Бизнесни ривожлантириш банки” АТБ вилоят ҳудудий бошқармасида “Аксилкоррупция ойлиги” доирасида очиқ эшиклар куни ўтказилди.
Тадбирда қайд этилишича, вилоят прокуратураси томонидан Ўзбекистон Республикасининг “Банк ва банк фаолияти тўғрисида”ги Қонун ҳужжатлари борасида 26 та текширишлар ўтказилиб, 28 та ҳужжатга протест, 10 та тақдимнома киритилган. Тақдимномалар муҳокамасига кўра, 113 нафар банк ходими интизомий, 6 нафари маъмурий жавобгарликка тортилган. Хусусан, 99 нафар мансабдор шахс огоҳлантирилиб, 52 миллиард 350 миллион сўмлик кредит маблағларининг талон-торожликлари бўйича 114 та жиноят иши қўзғатилган. Жиноят ишлари бўйича тергов давомида 17 нафар банкларнинг мансабдор шахслари ва 97 нафар қарздор жиноий жавобгарликка тортилган.
- Жорий йил 5 мартда Президентимиз томонидан коррупцияга қарши кураш бўйича Самарқанд тажрибасини йўлга қўйиш, соҳаларни рақамлаштириш орқали маиший коррупцияга барҳам бериш бўйича устувор вазифаларни белгилаб берилди, - дейди вилоят прокуратураси бўлим прокурори Жаъфар Шаропов. – Шунга асосан ўтган даврда вилоят прокуратураси ҳудудий кенгаш билан ҳамкорликда давлат органларида коррупциянинг олдини олиш ва унга қарши курашиш борасида “Йўл харита”си ишлаб чиқилди. Коррупциявий омилларни таҳлил қилиш учун штаб ташкил этилиб, 88 та идора ва ташкилотларга прокуратура ходимлари бириктирилди. Ҳар ойнинг 1-5 саналарида коррупцияга қарши кураш тадбирларини ташкил этишга қаратилган механизм ишлаб чиқилиб, назорат тадбирларини ўтказиш йўлга қўйилди. Шунингдек, ҳар ойда битта соҳада коррупцион ҳолатларни ўрганиш бўйича режа-жадвал ишлаб чиқилиб, натижаси ҳудудий кенгашда муҳокама қилиб келинмоқда.
Бундан ташқари, вилоятдаги давлат ташкилотларида ишловчи 6500 дан ортиқ давлат хизматчиси коррупцияга қарши кураш виртуал академиясида малака ошириб, сертификат олди. Ҳудудий кенгаш қарори билан 23 та йўналишдан иборат индикатор кўрсаткичлари тасдиқланиб, ҳар чоракда давлат органлари ва ташкилотларида коррупцияга қарши курашиш самарадорлигини рейтинг баҳолаш тизими жорий этилди. Айниқса, маиший коррупцияга қарши курашишда жамоатчилик назоратини кучайтиришга қаратилган ташкилотлар билан ҳамкорлик йўлга қўйилиб, уларнинг таклиф ва ташаббусларидан фойдаланиб “Йўл харита”си имзоланди. Давлат бошқарувларида инсон омилини камайтириш, ахборот коммуникация технологияларини кенг жорий этиш ишлари янада жадаллаштирилмоқда.
Банк ходимлари, мижозлар ва фуқаролар иштирок этган тадбирда коррупциянинг хунук оқибатлари, унинг жамиятга салбий таъсирлари тўғрисида маълумотлар берилди.
- “Бизнесни ривожлантириш банки” вилоят ҳудудий бошқармасида коррупцияга қарши кураш ойлиги доирасида “Очиқ эшиклар куни” тадбири ўтказилмоқда, - дейди “Бизнесни ривожлантириш банки” комплеанс назорат департаменти менежери Дилшод Самиев. – Бунда банкимизда ташкил қилинган комплеанс назорат департаменти томонидан коррупцияга қарши кураш соҳасида амалга оширилган ишлар ҳақида жамоатчиликка ахборот берилди. Банкда коррупциянинг олдини олиш учун мижозлар кредит олиш жараёнида кредитларни электрон тартибда олиш ҳамда мижозлар банкка келганда уларни идентификация қилиш мақсадида юз таниш тизими йўлга қўйилган. Бундан ташқари, банкда коррупцион ҳолатлар ҳақида маълумот қабул қилувчи алоқа каналлари ташкил қилинган. Жамоатчиликка ушбу алоқа каналлари 24/7 режимида ишлаб турганлиги ҳақида маълумот берилди.
Ўктам ХУДОЙБЕРДИЕВ,
Бахтиёр МУСТАНОВ сурат.
