Автомобилга ноқонуний газ баллони ўрнатиш оқибатида 23 нафар фуқаро вафот этган

Ҳозирда республикамизда тадбиркорлик субъектлари томонидан қурилган 1200 дан ортиқ автомобилларга газ тўлдириш компрессор шохобчалари (АГТКШ) ва 800 дан ортиқ автомобилларга суюлтирилган газ қуйиш шохобчалари (АГҚШ) фаолият кўрсатмоқда. Шу билан бирга, газ баллонларини ишлаб чиқарувчи бир нечта ташкилот мавжуд.

Газ баллонларини синовдан ўтказиш ваколатини берувчи 150 та корхона ва ташкилотларга белгиланган тартибда рухсатнома берилган.

2022 йилга қадар 1 млн. 570 мингдан ортиқ автотранспорт воситаларида 2,5 млн. дан ортиқ метан газ ва 200 минг дан ортиқ автотранспорт воситаларида суюлтирилган газ ёқилғисида ишлашга мослаштирилган газ баллонлари ўрнатилган.

Бироқ бугунги кунда баъзи юридик ва жисмоний шахсларлар томонидан синовдан ўтказилмаган газ баллонларидан фойдаланиш ҳолатлари аниқланмоқда.

Баъзи автомобилларга газ тўлдириш компрессор шохобчалари томонидан газ баллони билан жиҳозланган автомобилларга меъёридан ортиқ газ тўлдириш каби қонунбузарлик ҳолатлари қайд қилинмоқда.

Бунинг оқибатида охирги беш йил мобайнида автомобилларга ўрнатилган баллонларнинг портлаши билан боғлиқ 3 та фавқулодда вазият содир бўлган. Бунинг оқибатида 23 фуқаро вафот этган ва 20 фуқаро оғир тан жароҳатлари олган.

Таҳлилларга кўра, автомобиль баллонларининг портлашига қуйидагилар сабаб бўлмоқда:

- сифатсиз (металлокомпозит) баллонлардан фойдаланиш;

- баллонларни ишлаб чиқариш жараёнида технологик камчиликлар;

- автомобилларга баллонларни ўрнатиш ва синов ишларининг сифатсизлиги;

- автомобилларга сиқилган газ қуйишда рухсат этилганидан ортиқча босимда газ қуйилишидир.

Айтилган барча жараёнларда инсон омили иштироки оқибатида йўл қўйилаётган камчиликлар ва ҳозирги ҳолатда бу жараёнларни доимий назорат қилиш имконияти мавжуд эмаслиги муаммони чуқурлаштирмоқда.

Бу ҳақда АОКАда ўтказилган матбуот анжуманида маълумот берилди.