Автомобилларга газ қуйиш шохобчасида иккита автомашина ёниб кетди

Бугун, 28 июнь куни соат 05:40 да Жиззах вилояти Жиззах шаҳар “Сангзор” маҳалласи ҳудудида жойлашган автомобилларга газ қуйиш шохобчасида ёнғин келиб чиққан.

Вилоят фавқулодда вазиятлар бошқармасига келиб тушган маълумотга кўра, шохобчадаги “Matiz” ҳамда “Nexia” русумли автомашиналарга газ тўлдириш жараёнида техника хавфсизлиги қоидаларига риоя қилинмагани боис ёнғин келиб чиққан.

Мазкур ҳодиса юзасидан Жиззах вилоят фавқулодда вазиятлар бошқармаси ёнғин-қутқарув гуруҳи зудлик билан воқеа жойига етиб келган. Олиб борилган тезкор ҳаракатлар натижасида ёнғин ўз вақтида ўраб олиниб, қисқа фурсат ичида бартараф этилди.

Фавқулодда вазиятлар вазирлиги матбуот хизати хабарига кўра, ушбу ҳолатда жабрланган ва ҳалок бўлганлар аниқланмаган.