Avtomobillarga gaz quyish shoxobchasida ikkita avtomashina yonib ketdi

Bugun, 28 iyun kuni soat 05:40 da Jizzax viloyati Jizzax shahar “Sangzor” mahallasi hududida joylashgan avtomobillarga gaz quyish shoxobchasida yong‘in kelib chiqqan.

Viloyat favqulodda vaziyatlar boshqarmasiga kelib tushgan ma’lumotga ko‘ra, shoxobchadagi “Matiz” hamda “Nexia” rusumli avtomashinalarga gaz to‘ldirish jarayonida texnika xavfsizligi qoidalariga rioya qilinmagani bois yong‘in kelib chiqqan.

Mazkur hodisa yuzasidan Jizzax viloyat favqulodda vaziyatlar boshqarmasi yong‘in-qutqaruv guruhi zudlik bilan voqea joyiga yetib kelgan. Olib borilgan tezkor harakatlar natijasida yong‘in o‘z vaqtida o‘rab olinib, qisqa fursat ichida bartaraf etildi.

Favqulodda vaziyatlar vazirligi matbuot xizati xabariga ko‘ra, ushbu holatda jabrlangan va halok bo‘lganlar aniqlanmagan.