Андроид қурилмалар учун Zarnews.uz мобил иловаси. Юклаб олиш x

Белгиланган яйловда 1450 бош ўрнига 4 000 бош қўй боқилгани фуқароларнинг норозилигига сабаб бўлган

Ижтимоий тармоқларда Нуробод тумани марказига 6 минг бош қўй ҳайдаб келиш билан боғлиқ тарқалган видеолавҳа юзасидан Самарқанд вилояти ИИБ ахборот хизмати маълумот берди.

Унда айтилишича “Ҳолат 2021 йил 6 апрель куни соат 16:00 ларда содир бўлган.

Республика Пиллачилик ва қоракўлчиликни ривожлантириш қўмитаси томонидан “Самарқанд қоракўл кластер” МЧЖ корхонасига 151 минг гектар ҳамда “SP LUXE” МЧЖ қўшма корхонасига 197 243,4 гектар яйлов ер майдонлари ажратилган.

Кластер “SP LUXE” МЧЖ ва Қоракўлча массивида фаолият кўрсатаётган “Соҳибкор Ҳожиакбар” фермер хўжалиги ўртасида 49 йилга 834 гектар яйлов ер майдонини ижарага олиш бўйича шартнома тузилган бўлиб, шартномада 1450 бош майда шохли молларни боқиш кўрсатилган бўлса-да, ушбу ер майдонида фермер хўжалиги раҳбари томонидан 4 мингдан зиёд чорва моллари боқилганлиги Қиличли маҳалласи фуқароларининг норозилигига сабаб бўлган. Оқибатда кластернинг 1450 бош қўйлари маҳаллий аҳоли томонидан 2021 йил 6 апрель куни соат 16:00 ларда туман марказига ҳайдаб келинган.  

Шундан сўнг, туман ҳокими, туман ички ишлар бўлими бошлиғи бошчилигида “SP LUXE” МЧЖ қўшма корхонаси иш бошқарувчиси ҳамда фуқаролар билан йиғилиш ўтказилиб, “SP LUXE” МЧЖ раҳбари “Соҳибкор Ҳожиакбар” фермер хўжалиги ўртасида тузилган шартномани бекор қилиниши мутасаддилар назоратига олинди.

Юқоридаги каби ҳолатлар такрорланмаслиги мақсадида аҳолининг чорва молллари учун айни вақтларда юқоридаги кластер корхоналари томонидан маҳалла фуқаролар йиғинларига масъулияти чекланган жамиятлар ташкил этган ҳолда, биринчи навбатда қишлоқ аҳолиси чорва моллари учун ажратилиши бўйича келишиб олинди”.

P\S: Аввалроқ, каналимизда “Нуробод тумани ҳокимлиги олдига қўйлар суруви нега олиб келинди?” сарлавҳа остида хабар бериб, ушбу ҳолат юзасидан туман ҳокимлиги масъуллари иштирокида матбуот анжумани ўтказилаётганини ёзгандик.

Бироздан сўнг каналимизга Нуробод тумани ҳокимлиги ахборот хизмати томонидан ўтказилган ушбу тадбирда иштирок этган туман ҳокимининг қишлоқ ва сув хўжалиги масалалари бўйича ўринбосари Абдурашид Дўстмуродов ҳамда "SP LUXE" кластери таъсисчиси Икром Исломов фикрларини жойлаштирамиз.