БМТ АҚШнинг тинч аҳоли ҳаётига зомин бўлган Суриядаги ҳаво ҳужумларига изоҳ берди
АҚШнинг Суриядаги авиазарбалари ҳақидаги New York Times газетасида эълон қилинган мақолага изоҳ бериш сўровига жавобан: «Тинч аҳоли ўлимига сабаб бўлган ҳаракатлар учун жавоб бериш керак», деди БМТ Бош котиби расмий вакили ўринбосари Фархон Ҳақ.
Аввалроқ New York Times газетаси АҚШ ҳарбийлари 2019 йилнинг март ойида Сурияда ўнлаб тинч аҳоли ҳаётига зомин бўлган авиазарбалар ҳақида сукут сақлагани ва бу ҳодиса бўйича синчков тергов ўтказилмагани ҳақида хабар берган эди. Газетанинг ёзишича, Бағуз туманидаги ҳужум ИШИДга қарши олиб борилган жанговар ҳаракатлар давомида тинч аҳоли қурбонлари сони бўйича энг йирик ҳужумлардан бири бўлган. Аммо АҚШ ҳарбийлари буни расман тан олмаган. Шу билан бирга, газета таъкидлаганидек, дастлабки ҳисоб-китобларга кўра, ҳалок бўлганлар сони 70 га яқин.
“Биз тинч аҳоли ҳаётига зомин бўлган ҳар қандай ҳаракатлар учун жавобгарлик зарурлигини таъкидлаган бўлардик…”, деди Ҳақ.
Газетанинг ёзишича, гап 2019 йилнинг 18 мартида Суриянинг Бағуз вилоятида берилган зарбалар ҳақида кетмоқда. Газетанинг ёзишича, дастлаб Американинг F-15Е ҳужум самолёти Багуса ҳудудидаги оломон устига 500 фунтлик бомба ташлаган, шундан сўнг яна икки минг фунтлик бомба, кейин яна бир бомба ташланган. Номи ошкор этилмаган америкалик ҳарбий нашрга АҚШ ҳарбий-ҳаво кучларининг Қатардаги Эль-Удейд базасидаги қўшма ҳаво операциялари марказида нима содир бўлаётганини “ҳайратда, ишончсизлик билан” кузатганини тан олди – зарбаларни жонли эфирда учувчисиз аппарат тасвирга олаётган эди.
Таъкидланишича, Ҳарбий ҳаво кучлари юридик ходими тергов талаб қиладиган ҳарбий жиноят борлигини тан олган. Лекин, газета таъкидлаганидек, "деярли ҳар бир қадамда ҳарбийлар ҳалокатли зарбани яшириш чораларини кўришган". Ҳалок бўлганлар сони яширилган, мавзу бўйича ҳисоботлар эса «махфий» грифи остига олинган. Бундан ташқари, АҚШ бошчилигидаги коалиция кучлари зарбалар содир бўлган жойни бульдозер билан кўмишган. Юқори раҳбарият эса воқеа ҳақида хабардор қилинмаган, дея қўшимча қилинади New York Times ахборотида.
Нашр ўз хулосаларини АҚШ Марказий қўмондонлиги (CENTCOM)га юборганидан сўнг, қўмондонлик биринчи марта зарбаларни тан олди ва ўшанда 80 киши ҳалок бўлганини, бироқ ҳаво ҳужумлари “ўзини оқлаган”лигини билдирди. Қўмондонлик маълумотларига кўра, қурбонлар орасида 16 нафар жангчи ва тўрт нафар тинч аҳоли вакиллари бўлган. Қолган 60 нафар ҳалок бўлганларга келсак, "Исломий давлат"да аёллар ва болалар баъзан қўлига қурол олгани"ни ҳисобга олсак, улар тинч аҳоли бўлганми ёки йўқми номаълум, дейилади маълумотда.
Марказий қўмондонлик матбуот котиби Билл Урбан "қасддан қилинмаган ҳаракатлар оқибатида ҳалок бўлганлар учун қўмондонлик жавобгарликни тўлиқ ўз зиммасига олади” деди.
