Бошқа вилоятларга самолётда борамиз
Қайд қилинган иш Транспорт вазирлиги томонидан "Uzbekistan airways" АЖ ва "Uzbekistan airports" АЖ билан биргаликда амалга оширилади. Жумладан, Бухоро, Урганч, Термиз, Наманган ва Фарғона шаҳарларига парвозлар ташкил қилинади.
Бунда авиақатновлар қулай (эрталабки ва кечки) жадвал асосида амалга оширилади.
Ушбу янгилик давлат раҳбарининг "Самарқанд вилоятида инвестиция ва тадбиркорлик муҳитини янада ривожлантириш ҳамда аҳоли турмуш даражасини яхшилаш чора-тадбирлари тўғрисида"ги қарорида қайд қилинган.
Эски ҳовлилар ўрнида замонавий бинолар бўлади
Давлат раҳбари имзолаган ҳужжат билан танишаркансиз шаҳар инфратузилмаси яхшиланиши баробарида аҳолининг турмуш фаровонлигини оширишга алоҳида эътибор қаратилганига гувоҳ бўласиз. Зотан, янги иш ўринлари ёшлар ва малакали мутахассислар учун қўшимча имкониятлар яратиб, иқтисодиётни янада ривожлантириши, шубҳасиз.
Дарвоқе, кўҳна кентнинг Матонат, Меҳнат, Майсазор, Темирйўлчилар, Ипак йўли, Барака, Нурафшон, Нафосат, Садаф ҳамда Бағдод маҳаллаларидаги жисмонан ва маънан эскирган, авария ҳолатидаги 2 минг 878 та бир ва икки қаватли уйлар ўрнида реновация дастури асосида кўп қаватли замонавий уйлар қурилади. Янги турар жойлар аҳолининг яшаш шароитларини сезиларли даражада яхшилаш билан бирга, замонавий архитектура ва қулайликларни бирлаштирган муҳит яратади.
Қорасув массивида 600 та янги иш ўрни яратилади
Бунинг учун қиймати 1 триллион сўмга тенг лойиҳалар амалга оширилади. Хусусан, 89 гектар ер майдонида 16 та кўп қаватли турар жой мажмуаси, 1 та ижтимоий ҳамда 24 та савдо ва хизмат кўрсатиш объектлари барпо этилади.
Бундан ташқари, ушбу масканда Зарафшон дарёси бўйидаги 116 гектар ер майдонида аҳоли ҳордиқ чиқариши ва сайр қилиши учун барча шароитларга эга "Янги Ўзбекистон" боғи барпо этилади.
Йил якунигача Қорасув массивининг 3,7 километр ички йўллари жорий таъмирланади. Бу ўзгаришлар транспорт қатновининг яхшиланиши ҳамда пиёдалар учун хавфсиз, қулай шароит яратилишига хизмат қилиши шубҳасиз.
Инвестицион жозибадорлик ортяпти
Янги инфратузилмалар ва қулай шарт-шароит аҳолининг кундалик ҳаётини яхшилаш баробарида сайёҳлар, жумладан, инвесторларда ҳудудга катта қизиқиш уйғотмоқда.
Мисол учун, Самарқанд шаҳрида яна бир кардиология клиникаси иш бошлаши белгиланган. Президент имзолаган қарорда ушбу лойиҳага Буюк британиялик Тайман Вахид ва Муҳаммад Шер инвестиция киритаётгани кўрсатилган.
Бундан ташқари, 2025 йилда ирландиялик инвестор "ALC Blarney Aircraft Limitee"нинг ҳаво транспортида йўловчи ташиш хизматларини ташкил этишни режалаштиряпти.
Ё.Марқаев тайёрлади.
