Иқлим ўзгаришларига қарши Париж Конвенцияси: АҚШ нега бу Конвенцияни тарк этган?
2015 йил, 12 декабрда иқлим ўзгаришларга қарши Париж Конвенцияси қабул қилинган ва ўшанда унга дунёнинг 200 га яқин давлати қўшилган.
Орадан 2 йил ўтиб 2017 йил, 1 июнда янги сайланган АҚШ президенти Дональд Трамп у раҳбарлик қилаётган мамлакат иқлим ўзгариши бўйича Париж Конвенциясидан амалда чиққанини эълон қилди.
Трампнинг маълум қилишича, глобал иқлим ўзгаришига қарши кураш талаблари нафақат АҚШда балки дунёда миллионлаб иш ўринлари ва миллиардлаб долларларнинг йўқотилишига сабаб бўлади. Трампнинг бу қарори ўша пайтда бошқа кўплаб мамлакатлар томонидан кескин танқид қилинди.
Ўша қарорини эълон қилар экан, Трамп Оқ уй боғида чиқиш қилиб, Париж Конвенцияси нима учун АҚШга тўғри келмаслиги ҳақида гапирган эди. Ўшанда, Трампнинг таъкидлашича, у учун америкаликлар ҳақида қайғуриш бошқа ҳамма нарсадан ҳам муҳимроқ. Глобал ҳарорат кўтарилиши ортидан фалокатлар содир бўлиши эҳтимолини рад этмагани ҳолда, Трамп янги чекловлар 2025 йилга қадар АҚШда 2,7 миллион иш ўрнини қисқартириши, 2040 йилга бориб мамлакат иқтисодиёти уч триллион долларгача зарар кўриши ҳақидаги рақамларни келтирган.
АҚШ — атмосферани глобал иқлим ўзгаришининг катализатори ҳисобланган карбонат ангидрид гази билан «ифлослантириш бўйича чемпион».
Ҳозирда заҳарли моддаларни атмосферага чиқариш бўйича Хитой етакчи бўлса-да, умумий ҳисоб-китоблар бўйича айнан АҚШ атмосферани иссиқхона гази билан «тўйинтириш»да энг кўп «иштирок этган». АҚШнинг Париж Конвенциясидан чиқишига ҳам ана шу: ҳавога карбонат ангидрид чиқаришда дунёда пешқадам бўлгани ҳам сабаб бўлди.
АҚШ Париж Конвенциясига қўшилиб ўзининг ҳавога кўп миқдорда карбонат ангидрид чиқараётган йирик заводларининг фаолиятини чеклаш ниятида эмас. Яъни, кўчанинг тилида айтганда, Ер шари ҳам, ундаги бутун тириклик олами ҳам атроф-муҳит ифлосланиши ортидан нима бўлса бўлаверсин ва бу АҚШни заррача ташвишлантирмайди, деяпти жаноб Трамп.
Мамлакатимиз Париж Конвенциясига 2017 йил, 19 апрелда қўшилган ва
Ўзбекистон Олий Мажлиси Сенати 2018 йил, 27 сентябрь куни «Париж Конвенциясини (Париж, 2015 йил 12 декабрь) ратификация қилиш тўғрисида»ги қонунни тасдиқлади.
Трамп ўша 2017 йил, 1 июнда ўз мамлакатини Париж битимидан чиқариб олгани етмагандай бугунги кунда дунёнинг кўплаб мамлакатларидаги турли иқтисодий муаммоларга ўша 2015 йилда қабул қилинган Париж Конвенцияси қабул қилинганини сабаб қилиб кўрсатаяпти. Аммо у ҳақмикин? Ахир Она Еримизни асрашимиз ҳам керак-ку!
"Жаноб Трамп, сиз иқтисодий ва сиёсий жиҳатдан дунёдаги энг қудратли давлат раҳбарисиз ва ўзингиз президент бўлган мамлакатни сиёсий ва иқтисодий тарафдан ўзингиз хоҳлагандай бошқаришингиз мумкин. Аммо, шуни унутмангки, Ер шари фақат АҚШдан иборат эмас. Шунинг учун Ер шарида яшаётган бошқа халқларнинг аҳволини ҳам ўйланг ва Париж битимидан чиқиб уларни келажакда кутаётган хавфга тезроқ рўпара қилманг".
(Исми номаълум бўлган осиёликнинг 2017 йилда, Трамп АҚШнинг Париж битимидан чиқиши қарори ортидан унга юборган мурожаати)
