Жиззах ва Навоий вилоятларида эсган кучли шамол уйлар томи ва автомашиналарга зарар етказди

Кеча республикамизнинг Жиззах ҳамда Навоий вилоятларида 18-23 м/с тезликда кучли шамол эсди. Бунинг оқибатида айрим аҳоли яшаш хонадонлари ва транспорт воситаларига зарар етди.

Кучли шамол оқибатида Жиззах шаҳри Олмазор маҳалласида жойлашган 1-кўп қаватли уйнинг 300 квадрат метр майдондаги томёпмаси қулаб тушди. Ҳодисада, шу уй олдида бўлган “Lacetti” ва “Cobalt” русумли автомобилларга техник зарар етган.

Навоий вилояти Учқудуқ тумани Йўлчилар, Дўстлик, Айтим маҳаллалари ҳудудида жойлашган кўп қаватли аҳоли яшаш хонадонларида ҳам шундай ҳолатлар кузатилган. Жабрланганлар йўқ.

Фавқулодда вазиятлар вазирлиги матбуот хизмати хабарига кўра, ушбу ҳолат оқибатларини бартараф этиш мақсадида 2 та махсус техника ва 16 нафар қутқарувчи жалб этилган. Айни вақтда воқеа жойида зарурий тадбирлар амалга оширилиб, ишлар давом этмоқда.