Мактабларда янги ўқув йили 2 сентябрдан бошланади, раҳбар ходимларнинг ойлик маоши оширилади

Бугунги кун ҳолатида, умумий ўрта таълим мактабларига 86 минг 822 нафар бола 1-синфга қабул қилинган. Adm.maktab.uz платформаси орқали рўйхатдан ўтган 1-синф ўқувчиларига 12 турдаги ўқув қуролларидан иборат “Президент совғалари” етказиб берилган.

Республикамиз бўйлаб барча умумтаълим мактабларида янги – 2025-2026 ўқув йили дарс жараёнлари 2 сентябрдан бошланади.
Мактаблардаги ўқув жараёнининг биринчи дарс соатларида “Ватан учун, миллат учун, халқ учун!” шиори остида “Келажак соати” дарслари ўтказилади.
Республика Президентининг тегишли Фармонига мувофиқ, 2025 йил 1 сентябрдан бошлаб мактаб директорларининг ойлик маоши 20 фоизга, директор ўринбосарларининг ойлик маоши эса 15 фоизга оширилади.
2026 йил 1 январдан бошлаб директор ва унинг ўринбосарларига фаолият самарадорлиги кўрсаткичлари (KPI) натижасига кўра базавий тариф ставкаларига нисбатан 20 фоизгача устамалар жорий қилинади.