Андроид қурилмалар учун Zarnews.uz мобил иловаси. Юклаб олиш x

Миришкор тумани ҳокими ўринбосари 50 минг доллар пора билан қўлга олингани айтилмоқда

Қашқадарё вилояти Миришкор тумани ҳокими ўринбосари фуқарога ер олиб беришни ваъда қилиб 50 минг доллар олган пайтида қўлга олинган. Бу ҳақда ижтимоий тармоқларда хабарлар тарқалмоқда. Дарё нашрига кўра, вилоят ҳокими Муроджон Азимов иштирокидаги аппарат йиғилишида воқеа маълум қилинган.

Қайд этилишича, Миришкор тумани ҳокимининг 2021 йил сентябрь ойидан бери Маҳалла ва оилани қўллаб-қувватлаш масалалари бўйича ўринбосари сифатида ишлаб келаётган У.Я. фуқарога ер майдони олиб беришни ваъда қилиб, 80 минг доллар сўраган. 2022 йилнинг 5 февраль куни сўралган пулнинг 50 минг долларини олаётган пайтида қўлга тушган.

«Миришкорда, Муборакда «участкавой» бўлиб ишлаган, вилоят ИИБда бошқарма бошлиғи ўринбосари бўлган муттаҳам 80 минг доллар сўраб, 50 минг доллар билан қўлга тушган», деган вилоят раҳбари.

Таъкидланишича, вилоят ҳокими мазкур маълумотни жамоатчиликка очиқлаб, Миришкор тумани ҳокими Шерали Санаевга ҳам дакки берган. Шерали Санаев эса бу ҳолат туман учун иснод бўлганини, ҳокимлик вакилларининг юзи ерга қараганини билдириб, «Бизни айбимиз бу, ҳуқуқ тартибот органлари билан тизимли ишни йўлга қўйишни келишиб олдик. Ваъда бераман энди бундай бўлмайди», — деган.

Вилоят ҳокими Муроджон Азимов бунга жавобан Шерали Санаевга тоза йигит эканини, лекин назорат қилмаганини айтган. Шунингдек, вилоят Маҳалла ва оилани қўллаб-қувватлаш бошқармаси бошлиғи Долли Аллаевга «бу сизнинг ҳам айбиз, назорат қилмагансиз», дея танбеҳ берган.

Бош прокуратура матбуот котиби Ҳаёт Шамсутдиновнинг маълум қилишича, Миришкор тумани ҳокимининг ўринбосарига нисбатан Жиноят кодексининг 168- (фирибгарлик) ва 28-, 211- (пора бериш) моддалари билан жиноят иши қўзғатилган. Гумонланувчи процессуал тартибда ушланган.