Ногиронлиги бўлган шахсларнинг ижтимоий ҳимояси кафолатланган

Мамлакатимизда аҳоли ижтимоий ҳимоясига, айниқса, ногиронлиги бўлган шахсларни қўллаб-қувватлашга катта эътибор қаратиляпти. Масалан, Президентимизнинг шу йил 2 февралдаги “Ногиронлиги бўлган шахсларни ҳамда аҳолининг ижтимоий ҳимояга муҳтож қатламларинии қўллаб-қувватлашнинг қўшимча чора-тадбирлари тўғрисида”ги фармонига кўра,  шу йилнинг 1 апрелидан бошлаб меҳнатга лаёқатсиз фуқароларга бериладиган  ногиронлик нафақаси ҳамда иш стажи тўлиқ бўлмаган чоғдаги ногиронлик пенсиясининг энг кам миқдори 440 минг сўмдан 622 минг сўмгача оширилди. Ўзгалар парваришига муҳтож ногиронлиги бўлган боланинг қонуний вакилига ҳар ойда 500 минг сўм миқдорида парваришлаш нафақаси тўланадиган бўлди.

Бундан ташқари, вилоятимиз ҳудудида Тиббий ижтимоий хизматларни ровожлантириш агентлигига  қарашли Ургут "Мурувват" ногиронлиги мавжуд бўлган шахслар учун иккита интернат уйи фаолият юритяпти. Уларнинг бирида руҳий асаб хасталиги бўйича ногиронлиги бўлган аёллар, яна бирида шундай эркаклар истиқомат қилади. Улар орасидаги 18 ёшдан катта руҳий асаб касалликка чалинган 1- ва 2-гуруҳ ногиронлари тўлиқ давлат таъминотига олинган.

Бу каби муассасаларга ўхшаш бошқа муассасалар ҳам борки, улар фаолияти, бу ерда яшаётган ногиронлиги мавжуд болалар ва катта ёшдаги кишилар тақдири давлатнинг эътиборидан четда қолмаган. Бизнинг тиббий-экспертиза комиссияси жамоаси бу каби имтиёзларни ногиронлиги бўлган шахсларга етказиш, уларга кўмаклашиш мақсадида зарур тадбирларни белгилаб олган ва зарур тадбирларни амалга оширяпти.

Марҳабо Узоқова,

Самарқанд шаҳридаги 60-ТЭК бошлиғи.