Обод жойда байрам татийди
16-18 март кунлари вилоятимизда ҳам «Обод ва файзли маҳалла - юрт кўрки» шиори остида умумхалқ хайрия ҳашари ўтказилди.
Ўзбекистон маҳаллалари уюшмаси вилоят бошқармаси маълумотига кўра, тадбирда вилоятимизнинг 1126 та маҳалла фуқаролар йиғинидаги 1 миллион 174 минг фуқаро, жумладан, 711 мингга яқин ёшлар иштирок этган.
Жараёнда 1787 минг гектардан ортиқ ер майдони ободонлаштирилиб, ҳудудлардан 722 тонна маиший ва қурилиш чиқиндилари чиқариб кетилган.
Шунингдек, 1467 та қабристон, 725 та зиёратгоҳ тартибга келтирилди. Умумий ҳисобда 1035 километр ариқ ва зовур, 34 мингдан ортиқ кўча тозаланди. 633 та болалар майдончаси таъмирланиб, тартибга келтирилди.
Ҳашарда ижтимоий ҳимояга муҳтож аҳолига моддий ва маънавий кўмак бериш, уларнинг уй-жой шароитларини яхшилаш масалалари ҳам эътибордан четда қолмади. Уч кун давомида масъуллар ҳамда савобталаб инсонлар томонидан 8600 тадан зиёд шундай фуқаро истиқомат қиладиган хонадонларнинг томорқа ерлари чопилиб, турли кўчатлар ўтқазиб берилди. 750 нафар фуқаронинг уй-жойи таъмирланди.
Хусусан, Паст Дарғом тумани ёшлар етакчилари бирлашиб, якка-ёлғиз кексалар, оиласида меҳнатга яроқли инсони йўқ, ногиронлиги бўлган фуқароларнинг хонадонида ҳашар ташкил этди. Жараёнда уларнинг томорқаларига ишлов берилиб, ариқлари ковланди, эски, кўримсиз деворлар таъмирланиб, ранг берилди.
Умумхалқ хайрия ҳашари доирасида «Маҳалламга 10 туп кўчат – менинг туҳфам» шиори остида акция ўтказилди. Унда маҳаллаларда 782 та боғ ташкил этилиб, мавжуд бўш ер майдонлари ва аҳоли томорқаларига 1280 мингта мевали ва манзарали дарахт кўчатлари экилди ва мавжуд 658 мингта ортиқ дарахтларга шакл берилди. Кўча бўйлари, хиёбонларда бир неча юз минг туп гул кўчатлари ўтқазилди.
