Паст Дарғомда йил якунига қадар аҳолига яна 4550 дона суюлтирилган газ баллонлари тарқатилади

Айни пайтда туманда 63 минг 219 та хонадон мавжуд бўлиб, шулардан 55 минг 45 таси табиий ва суюлтирилган газ баллонлари билан таъминланган.

Табиий газ етиб борган хонадонлар сони 22 минг 182 тани ташкил этади. Жорий йил куз-қиш мавсумига тайёргарлик кўриш мақсадида 1,3 километр газ қувури мукаммал таъмирланди, 24 километр ер ости газ қувурлари текширилиб, 16 километри бўялди. Пўлатчи маҳалласининг Низомий кўчасида яшовчи аҳоли хонадонларининг газ таъминотини яхшилаш мақсадида 1,4 километрлик янги газ тармоғи тортилди.

Туманда суюлтирилган газ баллонлари билан таъминланган хонадонлар сони 32 минг 863 тани ташкил этиб, жорий йилда табиий газ тармоғи етиб бормаган аҳоли хонадонларига 9270 дона янги маиший газ баллонлари тарқатиш режалаштирилган. Бугунги кунга қадар аҳолига 4720 дона суюлтирилган газ баллонлари тарқатилган. Йил якунига қадар яна 4550 дона маиший газ баллонлари етказиб бериш бўйича ишлар амалга оширилмоқда.

Паст Дарғом тумани ҳокимлиги ахборот хизмати.