Самарқанд шаҳар кўркамлиги: Янги департамент қандай ишлаяпти?
Вилоят ҳокимлиги ҳузурида ободонлаштириш ва кўкаламзорлаштириш департаменти ташкил этилганига икки ойдан ошди.
Вазирлар Маҳкамасининг “Самарқанд шаҳрини ободонлаштириш ишларини самарали ташкил этиш ва бошқаришни такомиллаштириш чора-тадбирлари тўғрисида”ги қарорига асосан Самарқанд шаҳрининг алоҳида аҳамиятга эга марказий кўчалари ҳамда тарихий осори-атиқалари жойлашган ҳудудларга олиб борувчи йўналишларда ободонлаштириш ва кўкаламзорлаштириш ишларини сифатли амалга ошириш мақсадида ташкил этилган мазкур департамент олдига катта вазифалар қўйилган.
- Самарқанд шаҳрида ўтказилаётган халқаро даражадаги тадбирларда марказий кўчалар, тарихий обидалар жойлашган ҳудудларга олиб борувчи йўналишларда ободонлаштириш ишларини ташкил этяпмиз, - дейди вилоят ҳокимлиги ҳузуридаги ободонлаштириш ва кўкаламзорлаштириш департаменти директори Бахтиёр Жўраев. – Шу вақтгача ушбу вазифани бажариб келган Самарқанд шаҳар ободонлаштириш бошқармасидаги махсус техникалар эскириб қолганлиги, ободонлаштириш ҳудудининг кенгайиб, қўшимча махсус техника ва ишчи-ходимлар жалб этилаётгани сабабли уларга юкланган вазифалар лозим даражада бажарилмай қолаётган эди. Натижада соҳада илғор хорижий тажрибалар асосида ишлаш тизимини жорий этиш зарурати юзага келди. Шаҳар ободонлаштириш бошқармасидан 35 та махсус техника ва 754 нафар ишчи-ходимлар янги департаментга ўтказилди.
Вилоят ҳокими қарори билан янги департаментга шаҳардаги 21 та кўча ва ҳудудлар бириктирилган бўлиб, департамент ишчилари томонидан катта ҳажмдаги ободонлаштириш ва кўкаламзорлаштириш ишлари амалга ошириб келинмоқда. Жумладан, Самарқанд халқаро туризм маркази ва Имом Бухорий мажмуасига олиб борувчи кўчаларда 332 минг туп виола, геран, катарантус каби ўнга яқин манзарали гул экилди. Ландшафт дизайн асосида ўнга яқин гулзорлар ташкил этилиб, мавжуд яшил ҳудудлар кенгайтирилди. Йўл бўйлари ободонлаштирилиб, 182 та манзарали чироқлар ўрнатилди. Шунингдек, Регистон майдони, Бибихоним, Амир Темур мажмуалари ва бошқа тарихий обидалар жойлашган маҳаллалар атрофида эстетик муҳит яратиш мақсадида махсус безак элементлари ва яшил зоналар ташкил этилди.
Мустақиллик байрами арафасида ташкилот ишчилари зиммасидаги юмушлар жуда кўпайган. Байрам тадбирлари ўтадиган майдонларга турли кўргазмали бута ва гул кўчатлари ўтқазиш, ариқ ва лотоклар, йўл ёқаларини маиший чиқиндилардан тозалаш каби ишлар амалга оширилмоқда.
- Қилаётган ишларимиз кундан кунга сони ошиб бораётган расмий меҳмон ва сайёҳларнинг кўз ўнгида Самарқанд шаҳрининг туристик жозибадорлигини ошириш, тарихий обидаларнинг асл ҳолида сақланиб қолишига олиб келади, - дейди Бахтиёр Жўраев. – Шунингдек, бу ишларимиз тарихий меросимизни асраб-авайлаш ҳамда аҳолига қулай ва замонавий шаҳар муҳитини яратишга хизмат қилмоқда.
Дилмурод Тўхтаев.
