Самарқандда бир нечта локал қозонхоналар қурилади
“Гарчи кўп ўзгаришлар кузатилган бўлса-да, кўп қаватли уйларда ва коммунал соҳада ечимини кутаётган муаммолар ҳам ҳали анчагина”, дейди мутахассис. “Масалан, совуқ сув ва иссиқлик энергиясидан фойдаланиш, кўп қаватли уйларнинг яқин атрофларида санитария нормалари, гигиена талабларига тўлиқ жавоб бермаслик ҳолатлари кўп учрайди. Шунингдек, аҳоли сифатли ичимлик суви ва марказлаштирилган иссиқлик таъминоти билан етарли даражада таъминланмаяпти. Коммунал хизмат кўрсатиш корхоналари учун кадрлар тайёрлаш, қайта тайёрлаш ва малакасини ошириш масалаларида ҳам камчиликлар оз эмас. Бу каби муаммоларни бартараф этиш, коммунал соҳани ривожлантириш учун тинмай меҳнат қилиш, изланиш керак.
Айтайлик, ўрганишларимиз жараёнида айрим хонадон эгалари томонидан кўп қаватли уйнинг ички ва ташқи ҳолатларига, иситиш, алоқа ва бошқа тизимларга ўзбошимчалик билан ўзгартиришлар киритилгани маълум бўлмоқда. Жумладан, бинонинг юк кўтарувчи деворларидан эшиклар очиш, хоналарни кенгайтириш, вертикал вентиляция шахталарни беркитиш, иситиш тизимлари ўрнини алмаштириш каби ҳолатлар кўп учраяпти. Бундан ташқари, кўп қаватли уйларда иссиқлик таъминоти, канализация ва сув таъминоти билан боғлиқ муаммолар ҳам тез-тез кўзга ташланади.
Бу каби муаммоларни бартараф этиш учун 50 миллион доллар ажратилди. Шундан келиб чиқиб, Самарқанд шаҳрида бир нечта локал қозонхоналар қурилиши мўлжалланяпти. Уларнинг манзили эса иссиқлик тизими йўқлигидан энг кўп азият чеккан жойларга қаратилади. Кадрлар масаласида эса бошқачароқ усуллардан ҳам фойдаланишга қарор қилдик. Чунки уй-жой мулкдорлари ширкатлари раислари, биласиз, соҳа мутахассислари эмас, уларни бу муаммони қўлланма ва ёки бир-икки семинар билан ҳал этиб бўлмайди. Шу сабабдан бир қатор уй-жой мулкдорлари ширкатлари раислари Тошкентдаги энг яхши ширкатлар тажрибасини ўрганиб қайтмоқда. Минг марта эшитгандан бир марта кўрган яхши, дейишади-ку”.
Рустам САТТОРОВ билан суҳбатнинг тўлиқ матнини “Зарафшон” газетасининг 75-сонида ўқинг!
