Самарқандда профессионал таълим муассасаларига кириш тест синовлари бўлиб ўтмоқда

2023-2024-ўқув йили учун профессионал таълим муассасалари (коллеж ва техникум)га кириш тест синовлари 2023 йил 26 сентябрдан буён 2 сменада ўтказилмоқда.

Тест синовлари Самарқанд шаҳри, Иштихон, Каттақўрғон ва Пахтачи туманларида ташкил этилди. Вилоятдаги коллеж ва техникумларга 12 778 нафар абитуриентлар ҳужжат топширган. Бугунги кунга қадар абитуриентларнинг 6931 нафари тест синовларида иштирок этган. Айрим сабабларга кўра 2716 нафар абитуриент имтиҳонга келмаган. 6 нафар абитуриент тест синовлари қоидаларини бузганлиги учун имтиҳондан четлатилган.

Тест синови касб ва мутахассисликка мос 2 та фан ва барча тест топширувчилар учун мажбурий бўлган 3 та фан (она тили, математика, Ўзбекистон тарихи)дан тузилган. Унда талабгорларга мутахассислик фанларидан 30 тадан, мажбурий фанлардан 10 тадан жами 90 та тест топшириғи ва уларни ишлаш учун 3 соат вақт ажратиляпти.

Тест синовларида тўплаш мумкин бўлган максимал балл – 189 балл бўлиб, ҳар бир тўғри жавоб учун:

1-мутахассислик фанида — 3,1 баллдан (жами 93 балл);

2-мутахассислик фанида — 2,1 баллдан (жами 63 балл);

мажбурий фанларда — 1,1 баллдан (жами 33 балл) берилади.

Тест синовлари 30 сентябрга қадар давом этади.