Янги иссиқхонада илк бор 115 тонна помидор етиштирилди

10.07.2021 09:59
172
Иқтисодиёт

Оқдарё тумани ҳокимлиги томонидан ташкил этилган пресс-турда журналистлар ва блогерлар тумандаги янги ташкил этилган корхоналар фаолияти билан яқиндан танишдилар.

Пресс-тур иштирокчилари дастлаб Даҳбед маҳалласидаги “Asr imkon textile” МЧЖда бўлиб, корхонада ишлаб чиқарилаётган тайёр трикотаж маҳсулотларини кўздан кечирди.

Жорий йилда охиригача тўлиқ ишга туширилиши режалаштирилган корхонада 300 дан ортиқ ишсиз хотин-қизларни бандлигини таъминлаш кўзда тутилган. Умумий қиймати 14 миллиард 800 миллион сўм бўлган лойиҳага кўра, корхонада 20 турдаги тайёр трикотаж маҳсулотлар ишлаб чиқарилиши йўлга қўйилган.

- Ҳозирда корхонамизда ишлаётган 150 нафардан зиёд хотин-қизлар ишлаб чиқарган тайёр масулотлар юртимиз бозорларидан ташқари, Россияга ҳам экспорт қилинмоқда, - дейди корхона директори ўринбосари Жавоҳир Бурхонов. – Корхонамизда Туркия, Япония, Россия давлатларидан келтирилган замонавий тўқиш ва тикиш-бичиш асбоб-ускуналар ўрнатилган.

Тадбир иштирокчилари Даҳбед кичик саноат зонасида ҳам бўлишиб, 26 та иш ўрни яратилган “Xakim Bobo Grand” МЧЖ корхонасида 90 турдаги МДФ эшиклар ва мебел буюмлари ишлаб чиқарилиши билан танишишди.

Ўтган йили иш бошлаган "Badghisi agro group" МЧЖ томонидан фаолияти йўлга қўйилган замонавий иссиқхоналар туманнинг Барака массиви ҳудудида жойлашган. Умумий қиймати 2 миллиард 100 миллион сўм бўлган замонавий иссиқхонада илк бор 115 тонна помидор етиштирилиб, хорижга экспорт қилинди.